एकै परिवारका तीनै खेलाडीलाई सम्मान दिइयो

रसुवा जिल्ला खेलकुद विकास समितिले कालिका गाउँपालिका वडा १ का निवासी दावा तामाङ र उनका दुई छोरी, दिया र दीक्षालाई सम्मान गरेको छ। प्रभात तामाङले १३ औं रसुवा जिल्लास्तरीय राष्ट्रपति रनिङ सिल्ड खेलकुद प्रतियोगिताको समापन समारोहमा उनीहरुलाई सम्मान गरेका हुन्। दावाले मञ्जुश्री ट्रेल रेसको ८० किलोमिटर दूरीमा रजत पदक जितेका छन्।

दावा तामाङ र उनका छोरीहरुले खेलकुदमार्फत जिल्लालाई परिचित गराउन सफलता हासिल गरेका कारण सम्मानित गरिएको हो। दावाले विभिन्न राष्ट्रिय तथा अन्तर्राष्ट्रिय ट्रेल रेसमा प्रतिस्पर्धा गरिसकेका छन्। जेठी छोरी दियाले श्रीलङ्कामा भएको दक्षिण एसियाली कराते प्रतियोगिताको १४ वर्षमुनि उमेर समूहमा रजत पदक प्राप्त गरेकी छन् भने कान्छी छोरी दीक्षाले सोही प्रतियोगिताको १० वर्षमुनि उमेर समूहमा कास्य पदक जितेकी छन्। बुवा दावा पनि कराते पृष्ठभूमिका खेलाडी हुन्।