नेपाल खेलकुद पत्रकार मञ्चले वरिष्ठ खेलकुद पत्रकार रोशन सिंह राउत र युवा पत्रकार नायक पौडेललाई सम्मान गरेको छ। राष्ट्रिय खेलकुद परिषद्का सदस्य सचिव राम चरित्र मेहताले मञ्चको २१ औं साधारण सभामा दुवै पत्रकारलाई सम्मानपत्र प्रदान गरेका थिए। १३ वैशाख, काठमाडौँमा आयोजित कार्यक्रममा रोशनलाई ‘अग्रज खेल पत्रकारिता सम्मान २०७९’ र नायकलाई ‘सुमन भोम्जन स्मृति युवा पत्रकारिता पुरस्कार-२०७९’ बाट पुरस्कृत गरिएको हो।
अग्रज सम्मान पाएका राउतलाई सम्मानपत्रसहित नगद ३५ हजार र युवा पत्रकार नायकलाई ल्यापटप पुरस्कार प्रदान गरिएको थियो। रोशन सिंह राउतले झन्डै ३ दशक खेलकुद पत्रकारितामा बिताएका छन् र उनले विभिन्न मिडियामा काम गरेका छन्। उनले दक्षिण एसियाली खेलकुद प्रतियोगिता, एसियाली खेलकुद र फिफा विश्वकप छनोटको फिल्ड रिपोर्टिङ गरेका छन्। सम्मान प्राप्त गरेपछि उनले भने, ‘यो सम्मान मेरो लागि अत्यन्त विशेष छ। किनभने यो मैले आफ्नै परिवारबाट पाएको हुँ।’
युवा पत्रकार नायक पौडेलले द राइजिङ नेपाल र द काठमान्डु पोस्टमा काम गरेका छन्। उनले एएफसी महिला एसियन कप छनोट र टी-२० क्रिकेट विश्वकपमा उत्कृष्ट समाचार सम्प्रेषण गरेका थिए। पुरस्कार प्राप्त गरेपछि उनले भने, ‘अग्रज पत्रकारहरूको प्रेरणाले म यो पुरस्कारको हकदार हुन सकेँ। यस्तो प्रेरणा भविष्यमा पनि पाइरहने विश्वास छ।’ समारोहका प्रमुख अतिथि राम चरित्र मेहताले पुरस्कृत पत्रकारलाई बधाई दिँदै मञ्चको साधारणसभाको सफलताको कामना गरेका थिए।
