इरानका विदेशमन्त्री अब्बास अराघची रुसको सेन्ट पिटर्सबर्गमा युद्धको अवस्था र वर्तमान विषयमा छलफल गर्न पुगेका छन्। उनले पाकिस्तानलाई मध्यस्थकर्ताको रूपमा वर्णन गर्दै इरान-अमेरिका वार्तामा यसको महत्वपूर्ण भूमिका रहेको बताएका छन्। अराघचीले पाकिस्तान र ओमानमा मध्यपूर्वको पछिल्लो अवस्थाबारे छलफल गरिसकेको जानकारी दिएका छन्।
अराघचीले रुससँग नियमित वार्ता गरिरहेको उल्लेख गर्दै युद्धको कारणले केहिदिनदेखि बैठकहरू ठप्प भएको बताएका छन्। उनले भने, “हामी हाम्रा रूसी साझेदारहरूसँग युद्धको अवस्था र हालको परिप्रेक्ष्यमा छलफल गर्नेछौं। पछिल्ला घटनाहरूको समीक्षा गर्नेछौं। आवश्यक समन्वय हुनु स्वाभाविकै हो।”
पाकिस्तानलाई उल्लेख गर्दै उनले भने, “इरान-अमेरिका वार्तामा पाकिस्तानले मध्यस्थकर्ताको रूपमा महत्वपूर्ण भूमिका खेलेको छ। हामीले पाकिस्तानमा हाम्रा साथीहरूसँग राम्रो संवाद गर्यौं। भगवानको कृपाले यो सफल भ्रमण रह्यो।”
अराघचीले थपे, “हामीले विगतमा के भयो भनेर समीक्षा गर्यौं र कसरी, के अवस्थामा वार्ता अगाडि बढाउन सकिन्छ भन्ने विषयमा छलफल गर्यौं।” यसअघि अराघची पाकिस्तान र ओमान पनि भ्रमण गरेका थिए, जहाँ उनले मध्यपूर्वको पछिल्लो अवस्थाप्रति छलफल गरेका थिए।
