प्रदीप खड्का र शिभाली गुरुङले १२औं सिटिजन्स बैंक खुला टेनिस प्रतियोगितामा पुरुष र महिला सिंगल्सको च्याम्पियन बनेका छन्। प्रदीपले प्रणव मानन्धरलाई २–६, ६–३ र ६–४ को सेटमा पराजित गरे भने शिभालीले स्वस्तिका विष्टलाई ३–६, ६–३ र ६–१ को सेटमा हराइन्। प्रतियोगितामा १२ स्पर्धामा १५४ खेलाडीले प्रतिस्पर्धा गरेका थिए र कुल ५ लाख ६८ हजार ७ सय ५० रुपैयाँ नगद पुरस्कार वितरण गरिएको थियो। १९ वैशाख, काठमाडौं।
प्रदीप खड्का र शिभाली गुरुङले १२औं सिटिजन्स बैंक खुला टेनिस प्रतियोगितामा शनिबार पुरुष र महिला सिंगल्सको च्याम्पियन बनेका छन्। पुरुष सिंगल्समा प्रदीप र महिला सिंगल्समा शिभालीले पहिलो स्थान हासिल गरे। दुवैले पहिलो सेटमा पछि परेको अवस्थालाई उल्ट्याउँदै उपाधि हात पारे। त्रिपुरेश्वरस्थित राष्ट्रिय खेलकुद परिषद्को कोर्टमा भएको पुरुष फाइनलमा प्रदीपले प्रणव मानन्धरलाई २–६, ६–३ र ६–४ को सेटमा हराए।
सिटिजन्स बैंकको मुख्य प्रायोजनमा काठमाडौं जिल्ला टेनिस संघद्वारा आयोजित प्रतियोगितामा महिला सिंगल्सको फाइनलमा शिभालीले स्वस्तिका विष्टलाई ३–६, ६–३ र ६–१ को सेटमा पराजित गरिन्। नेपाल टेनिस संघको सहयोगमा सम्पन्न प्रतियोगितामा जम्मा १२ विभिन्न स्पर्धामा कुल १५४ खेलाडीले प्रतिस्पर्धा गरेका थिए। पुरुष डबल्समा प्रणव खनाल र आयुशमान हजुर घलेको जोडी, ३५ वर्षमाथि पुरुष सिंगल्समा सन्तोष खत्री, ३५ वर्षमाथि पुरुष डबल्समा जितेन्द्र परियार र छेवाङ लामाको जोडी, ४५ वर्षमाथि पुरुष सिंगल्समा देव क्षेत्री, ४५ वर्षमाथि पुरुष डबल्समा रोहित सुनुवार र महेश श्रेष्ठको जोडीले पहिलो स्थान हासिल गरे।
त्यसैगरी ५५ वर्षमाथि पुरुष सिंगल्समा विमलकुमार गुरुङ, ५५ वर्षमाथि पुरुष डबल्समा चन्द्र शाही र सोभितमान श्रेष्ठको जोडी, ६५ वर्षमाथि पुरुष सिंगल्समा कमल थापा, ६५ वर्षमाथि पुरुष डबल्समा कमल थापा र छ्याम्बा डुन्डुपको जोडी तथा ७० वर्षमाथि पुरुष सिंगल्समा धीरबहादुर गुरुङ च्याम्पियन बने। विजेतालाई सिटिजन्स बैंकका निर्देशक विजयध्वज कार्की, प्रमुख कार्यकारी अधिकृत गणेशराज पोखरेल, नेपाल टेनिस संघका अध्यक्ष मनोहरदास मुल र महासचिव निरेश श्रेष्ठ, तथा आयोजक काठमाडौं जिल्ला टेनिस संघका अध्यक्ष प्रवीण वैद्यले एक कार्यक्रमका बीच पुरस्कार प्रदान गरेका थिए। विभिन्न १२ स्पर्धामा १५४ खेलाडीले प्रतिस्पर्धा गरेका थिए। सबै स्पर्धाका पदक विजेतालाई आयोजकको तर्फबाट कुल ५ लाख ६८ हजार ७ सय ५० रुपैयाँ नगद पुरस्कार प्रदान गरिएको थियो। यसका अतिरिक्त, सिटिजन्स बैंकले पुरुष/महिला सिंगल्सका विजेता र उपविजेतालाई छुट्टै गरी कुल १ लाख ३१ हजार २ सय ५० रुपैयाँ नगद पुरस्कार उपलब्ध गराएको थियो।
