च्याम्पियन्स जुडो एकेडेमीले जेठ २३ गते दोस्रो खुला जुडो प्रतियोगिता आयोजना गर्दैछ। पुरुष तथा महिलाका लागि समान रूपमा २–२ गरी कुल ४ तौलसमूहमा खेल हुनेछ। प्रथम स्थानधारीले ५ हजार रुपैयाँ, दोस्रोले ३ हजार र तेश्रो स्थानधारीले २ हजार रुपैयाँ नगदसहित गिफ्ट ह्याम्पर प्राप्त गर्नेछन्।
काठमाडौंमा २९ वैशाखमा आयोजित कार्यक्रममा च्याम्पियन्स जुडो एकेडेमीका निर्देशक सरोज महर्जनले प्रतियोगिताको बारेमा जानकारी दिएका छन्। पुरुष तर्फ ७३ केजीमुनि र १०० केजीमुनि तौलसमूहमा खेल हुनेछ भने महिलातर्फ ५७ केजीमुनि र ७८ केजीमुनि तौलसमूहमा प्रतिस्पर्धा हुनेछ।
प्रतियोगितामा विदेशी खेलाडीहरूको सहभागिताका लागि समेत व्यवस्था गरिएको छ। यो एकदिने प्रतियोगिता खुशिबुँस्थित बहुउद्देश्यीय मार्शल आर्ट्स सेन्टर (एमएमएसी) को हलमा आयोजना गरिनेछ।
