काठमाडौं महानगरपालिकाकी कार्यवाहक प्रमुख सुनिता डंगोलले कान्स फिल्म फेस्टिभलमा नेपाली चलचित्रले पहिलोपटक ‘जुरी प्राइज’ प्राप्त गर्नु ऐतिहासिक सफलता भएको बताउनुभयो। अविनाश विक्रम शाह निर्देशित ‘इलिफेन्ट इन द फग’ले अनसर्टेन रिगार्ड विधामा यो सम्मान पाएको छ। डंगोलले काठमाडौंमा पहिलो पटक ‘काठमाडौं फिल्म फेस्टिभल’ आयोजना गर्ने तयारी भइरहेको र फ्रान्सका मेयरलाई निमन्त्रणा दिएको जानकारी दिनुभयो। ९ जेठ, काठमाडौं।
काठमाडौं महानगरपालिकाकी कार्यवाहक प्रमुख सुनिता डंगोलले फ्रान्सको कान्समा भएको यस वर्षको फिल्म फेस्टिभल नेपालका लागि ऐतिहासिक रुपमा नतिजा ल्याएको बताइन्। फेस्टिभलमा सहभागिता गरेर शनिबार स्वदेश फर्किएपछि त्रिभुवन विमानस्थलमा सञ्चारकर्मीहरूसँग कुरा गर्दै डंगोलले फेस्टिभलको इतिहासमा नेपाली चलचित्रले पाएको यो पहिलो अवसर महत्वपूर्ण र ऐतिहासिक भएको उल्लेख गरिन्। अविनाश विक्रम शाह निर्देशित नेपाली चलचित्र ‘इलिफेन्ट इन द फग’ले अनसर्टेन रिगार्ड विधामा ‘जुरी प्राइज’ प्राप्त गर्नुले नेपाली चलचित्र, रचनात्मक उद्योग र कला क्षेत्रमा उच्च स्तरको प्रगति भएको उनले बताइन्।
‘फिल्म प्रदर्शनपछि हलमा उपस्थित दर्शकहरूले करिब ७–८ मिनेटसम्म उभिएर सम्मान जनाए। यो पल सम्पूर्ण नेपालीहरूका लागि भावुक र गर्विलो क्षण थियो। अन्तर्राष्ट्रिय मञ्चमा नेपालीहरूले मात्र मन जितेका छैनन्, उपाधि पनि जित्नु ठूलो उपलब्धि हो,’ उनले भनिन्। उनले अन्तर्राष्ट्रिय स्तरका ज्ञान, सीप र अनुभवलाई उपयोग गरी फिल्म महोत्सवको माध्यमबाट रचनात्मक उद्योगसँग सम्बन्धित क्षेत्रहरूको सन्तुलित विकास गर्न महानगर उत्सुक भएको व्यहोरा पनि व्यक्त गरिन्।
‘सिर्जनशील क्षेत्रलाई ‘वान टाइम प्रोग्राम’ मात्र नभई संस्थागत स्वरूप प्रदान गर्न हामीले नीतिगत छलफल अघि बढाएका छौं। भ्रमणका क्रममा विभिन्न शहरका प्रतिनिधिहरूसँग भेट्दा काठमाडौं महानगरपालिकाले पहिलो पटक ‘काठमाडौं फिल्म फेस्टिभल’ आयोजना गर्ने तयारीमा रहेको जानकारी गराउँदा उनीहरू उत्साहित भएका छन्,’ उनले भनिन्। फ्रान्सको कान्स नगरका मेयर डेभिड लिसनार्डको निमन्त्रणा पाउँदै फ्रान्स गएकी डंगोलले मेयर लिसनार्डलाई काठमाडौं चलचित्र महोत्सवमा सहभागी हुन पनि निमन्त्रणा दिएकी छन्।
