समाचार सारांश
समीक्षा पश्चात तयार पारिएको।
- बाँके जिल्लामा दुई दिनसम्म परेको बेमौसमी वर्षाले करिब आठ करोड ७५ लाख रुपैयाँ बराबरको काँचो इँटामा क्षति पुर्याएको छ।
- इँटा उद्योग व्यवसायी सङ्घ लुम्बिनी प्रदेशका उपाध्यक्ष दीपक अधिकारीले जिल्लाका ७० वटा इँटा उद्योगमा तीन करोड ५० लाख काँचो इँटा नष्ट भएको जानकारी दिनुभयो।
- इँटा उद्योग व्यवसायी सङ्घ बाँकेका अध्यक्ष देवबहादुर केसीले सरकारले काँचो इँटाको बिमा नगर्ने र क्षतिपूर्ति नदिने हुँदा व्यवसायीलाई ठूलो समस्या परेको बताए।
८ चैत, नेपालगञ्ज । दुई दिनसम्म परेको बेमौसमी वर्षाले करिब नौ करोड रुपैयाँ बराबरको काँचो इँटामा ठूलो क्षति पुर्याएको छ।
इँटा व्यवसायीका अनुसार पोल्न तयार गरिएको ठूलो परिमाणको काँचो इँटा वर्षाले नष्ट भएपछि व्यवसायीहरूले करिब ८ करोड ७५ लाख रुपैयाँ बराबरको क्षति व्यहोरेको जानकारी इँटा उद्योग व्यवसायी सङ्घ लुम्बिनी प्रदेशका उपाध्यक्ष तथा बाँकेस्थित पिबिसी इँटा उद्योगका सञ्चालक दीपक अधिकारीले दिनुभयो। उहाँले बेमौसमी वर्षाले एउटै उद्योगमा मात्र करिब पाँच लाख रुपैयाँ बराबर काँचो इँटा नष्ट भएको पनि बताउनुभयो।
उहाँका अनुसार जिल्लाभरिका ७० वटा इँटा उद्योगमा कुल तीन करोड ५० लाख रुपैयाँ बराबर काँचो इँटा नष्ट भएको छ, जसले गर्दा कुल ८ करोड ७५ लाख रुपैयाँ बराबरको आर्थिक क्षति भएको हो।
एक काँचो इँटाको मूल्य २.५० रुपैयाँ पर्नेछ, अधिकारीले जानकारी दिनुभयो।
व्यवसायीहरूको अनुसार खुला ठाउँमा भर्खरै तयार पारेर सुकाउन राखिएका धेरै इँटा वर्षाको पानीले भिजेर माटोमा परिणत भएका छन्। साथै, कर्णालीमा परेको हिमपातपछि बाँकेमा परेको वर्षाले यहाँका व्यवसायीहरूलाई ठूलो आर्थिक क्षति पुर्याएको छ।
इँटा उद्योग व्यवसायी सङ्घ बाँकेका अध्यक्ष देवबहादुर केसीले प्रत्येक वर्ष बेमौसमी वर्षाका कारण जिल्लाका उद्योगीहरूलाई ठूलो आर्थिक चोट लाग्ने गरेको जानकारी दिनुभएको छ।
उहाँले सरकारले काँचो इँटाको बीमा नगर्ने र क्षतिपूर्ति नदिने भएकाले व्यवसायीहरू ठूलो समस्यामा परेका विषय उठाउनुभयो। रासस
सम्बन्धित खबर
