१५ जेठ, काठमाडौँ। पूर्वअर्थमन्त्री तथा नेकपा एमालेका उपाध्यक्ष विष्णुप्रसाद पौडेलले सरकारले प्रस्तुत गरेको बजेटलाई महत्त्वाकांक्षी भनेका छन्। संघीय संसदमा अर्थमन्त्री डा. स्वर्णिम वाग्ले द्वारा प्रस्तुत बजेटको मुख्य चुनौती कार्यान्वयनमा रहेको उनको भनाइ छ। ‘हामीमाथि अन्तर्राष्ट्रिय परिस्थितिले पनि प्रभाव पारिरहेको छ। अहिलेको अन्तर्राष्ट्रिय अवस्था प्रतिकूल छ,’ पौडेलले बताएका छन्।
उनले थपे, ‘बाह्य ऋण र अनुदान ल्याउनु अहिले सजिलो छैन। यस्तो परिस्थितिमा बजेट तयार पार्नु जरुरी थियो।’ यद्यपि, संशोधित बजेटको आकार २५ प्रतिशतले बृद्धि भए तापनि बजेटको कार्यान्वयन सहज नहुने पौडेलले बताएका छन्। बजेटको आकार बढे तापनि त्यस अनुसार स्रोत व्यवस्थापन गर्न नसक्दा कार्यान्वयन प्रभावित हुने उनको धारणा रहेको छ।
