फिफा विश्वकपको समूह चरण अन्तर्गत दोस्रो खेलमा चेक रिपब्लिक र दक्षिण अफ्रिका १–१ को बराबरीमा रोकिएका छन्। खेलको छैटौं मिनेटमा चेक रिपब्लिकले अग्रता लिए पनि ८३औं मिनेटमा दक्षिण अफ्रिकाका तेबोहो मोकोनाले पेनाल्टीबाट बराबरी गोल फर्काए। लगातार दोस्रो खेलमा जित निकाल्न नसकेका दुवै टोलीको नकआउट चरणमा पुग्ने सम्भावना कमजोर बनेको छ।
४ असार, काठमाडौं। फिफा विश्वकप–२०२६ अन्तर्गत समूह चरणको दोस्रो राउन्डको पहिलो खेलमा चेक रिपब्लिक दक्षिण अफ्रिकासँग १-१ को बराबरीमा रोकिएको छ। एटलान्ट स्टेडियममा भएको खेलमा अग्रता कायम राख्न नसक्दा चेक रिपब्लिकले बराबरी खेल्न बाध्य भयो। खेलको छैटौं मिनेटमा चेक रिपब्लिकका मिचल सादिलेकले गोल गर्दै टिमलाई अग्रता दिलाएका थिए।
लामो समय अग्रता कायम राखेको चेक रिपब्लिक अन्ततः ८३औं मिनेटमा पेनाल्टीका कारण गोल खायो। खेलको ८३औं मिनेटमा डिबक्सभित्र चेक रिपब्लिकका खेलाडीको हातले बल छोएपछि दक्षिण अफ्रिकाले पेनाल्टी पाएको थियो र तेबोहो मोकोनाले त्यसलाई सदुपयोग गर्दै बराबरी गोल फर्काए। बल पोजिसन र सर्ट प्रहारमा दक्षिण अफ्रिकाले दवदबा राख्यो। खेलभर दक्षिण अफ्रिकाको बल कब्जा ६१ प्रतिशत रहँदा चेक रिपब्लिकको ३९ प्रतिशतमा सीमित रह्यो।
दक्षिण अफ्रिकाले १७ सर्ट प्रहार गर्दा ५ मात्र टार्गेटमा पुग्न सके। चेक रिपब्लिकले १२ सर्ट प्रहार गर्यो जसमा ३ मात्र उनले टार्गेटमा हान्यो। उक्त समूहको अर्को खेल मेक्सिको र दक्षिण कोरियाबीच राति पौने एक बजेबाट सुरु हुनेछ। पहिलो खेलमा पराजित दुवै टोली दोस्रो खेलमा बराबरी खेल्दा नकआउट चरणमा पुग्ने सम्भावना कमजोर भएको छ। समूह ‘ए’ मा मेक्सिको र दक्षिण कोरिया एक खेलबाट समान ३ अंक जोडिसकेका छन् भने दक्षिण अफ्रिका र चेक रिपब्लिक दुई खेलबाट समान १ अंकमा छन्।
सम्बन्धित खबर
