सूर्य नेपाल प्रिमियर गल्फ च्याम्पियनसिपको उपाधि सुबाश तामाङले प्ले–अफमा भुवन नगरकोटी र सदभाव आचार्यलाई परास्त गर्दै जितेका छन्। उपाधिसँगै सुबाशले ३ लाख २० हजार रुपैयाँ पुरस्कार प्राप्त गरे भने तीनै खेलाडीले ७२ होलको खेल १८–अन्डर २७० स्कोरमा पूरा गरे। यस सिजनमा कुल १० लाख ३३ हजार ५ सय रुपैयाँ जित्दै भुवन नगरकोटी सूर्य नेपाल गल्फ टुरका नम्बर एक खेलाडी बन्न सफल भएका छन्।
४ असार, काठमाडौं। सूर्य नेपाल गल्फ टुर २०२५–२६ अन्तर्गत सिजनको अन्तिम प्रतियोगिता सूर्य नेपाल प्रिमियर गल्फ च्याम्पियनसिपको उपाधि प्ले–अफमा सुबाश तामाङले जितेका छन्। प्ले–अफको पहिलो होलमा भुवन नगरकोटी र एमेच्योर सदभाव आचार्यलाई हराउँदै उनी च्याम्पियन बनेका हुन्। उनले उपाधिसँगै ३ लाख २० हजार नगद पुरस्कार प्राप्त गरे। सुबाश, भुवन र सदभाव तीनैजनाले ७२ होलको खेल समग्रमा १८–अन्डर २ सय ७० मा सम्पन्न गरे।
प्ले–अफमा सुबाशले पार खेल्दा भुवन र सदभावले दुवैले पार मिस गरे। यससँगै सुबाशले च्याम्पियनशिपसहित उपाधि हात पारे। भुवन दोस्रो हुन पुगे र उनले नगद २ लाख ६ हजार पुरस्कार पाए। सुबाशले आज ३–अन्डर ६९ खेल खेले। तेस्रो होलको बोगीका विरुद्ध सातौं होलमा बर्डी प्रहार गर्दै फ्रन्ट नाइन इभन–पार ३६ पूरा गरे। त्यसपछि ११ औं देखि १३ औं होलसम्म गरिएको तीन बर्डीसहित ३–अन्डर ३३ खेल्दै फिनिस गर्यो।
सदभावले आज उत्कृष्ट प्रदर्शन गर्दै ६–अन्डर ६६ को स्कोर कार्ड तयार पारे। उनले फ्रन्ट र ब्याक नाइन दुवै ३–अन्डर ३३ खेले। प्ले–अफमा पुगेका सदभाव एमेच्योरतर्फ विजेताका रूपमा घोषित भए। उनले राहुल विश्वकर्मालाई ८ स्ट्रोकले पराजित गरे। आज फाइनल ग्रुपमा खेलेका शुक्र बहादुर राई समग्रमा १५–अन्डर २ सय ७३ सहित चौथो स्थानमा रहे।
विजयी खेलाडीहरूलाई सूर्य नेपाल प्रालिका म्यानेजिङ डिरेक्टर गौरव तयाल र एनपिजिका अध्यक्ष रविन्द्रमान श्रेष्ठले पुरस्कार प्रदान गरे। कुल १८ लाख रुपैयाँ नगद पुरस्कार राशी रहेको प्रतियोगितामा शीर्ष १८ जना प्रोले नगद पुरस्कार प्राप्त गरे। सूर्य नेपाल गल्फ टुर २०२५–२६ का आठवटा प्रतियोगिता सकिएपछि आगामी सिजनमा भुवन नगरकोटी नम्बर एक खेलाडी बन्ने निश्चित भएको छ।
