कृषि, वन तथा वातावरण मन्त्री गीता चौधरीले वातावरण र दिगो विकाससम्बन्धी दुई अन्तर्राष्ट्रिय सम्मेलनमा भाग लिन आज थाइल्यान्डको बैंकक प्रस्थान गरेकी छन्। मन्त्री चौधरीले असार १५ र १६ गते हुने पेरिस सम्झौता र दिगो विकाससम्बन्धी सातौँ विश्व सम्मेलनमा जलवायु परिवर्तनका असरहरूबारे नेपालको तर्फबाट ध्यानाकर्षण गराउनेछिन्। उनी असार १७ देखि १९ गतेसम्म सञ्चालन हुने वातावरण तथा विकाससम्बन्धी समितिको मन्त्रीस्तरीय नवौँ सत्रमा पनि सहभागी भई नेपालको वातावरणीय प्रतिबद्धता प्रस्तुत गर्नेछिन्।
मन्त्री चौधरीको नेतृत्वमा नेपाली प्रतिनिधिमण्डल मन्त्रिपरिषद्को २९ जेठको निर्णयअनुसार थाइल्यान्ड प्रस्थान गरेको हो। उनले जुन २९ देखि ३० (असार १५ र १६ गते) सम्म बैंककमा आयोजना हुने ‘पेरिस सम्झौता र दिगो विकासका लागि सन् २०३० को कार्यसूची (एजेन्डा) बीचको आपसी तादात्म्य सुदृढीकरण सम्बन्धी सातौँ विश्व सम्मेलन’ मा सहभागिता जनाउनेछिन्। यस सम्मेलनको मुख्य उद्देश्य जलवायु परिवर्तन नियन्त्रणका लागि गरिएको पेरिस सम्झौतासँग संयुक्त राष्ट्र संघको दिगो विकास लक्ष्यहरूबीच प्रभावकारी समन्वय र सहकार्य गर्नका लागि छलफल गर्नु हो।
मन्त्री चौधरीले जलवायु परिवर्तनका कारण नेपालजस्ता हिमाली मुलुकले भोग्नुपरेका विशिष्ट चुनौतीहरू र हरित विकासका लागि नेपालले गरेका प्रयासहरूबारे विश्व समुदायको ध्यानाकर्षण गराउने कार्यक्रम रहेको छ। यस भ्रमणमा मन्त्री चौधरीसँग मन्त्रालयका सहसचिव (प्राविधिक) डा. राजेन्द्र केसी पनि सहभागी छन्।
