१६ असार, काठमाडौं । भारतले अफगानिस्तानमाथि पाकिस्तानले गरेको हवाई आक्रमणलाई कडा रुपमा निन्दा गर्दै ज्यान गुमाउनेहरूका परिवारप्रति समवेदना व्यक्त गरेको छ। भारतले यस कदमलाई अफगानिस्तानको सार्वभौमिकतामाथि गरिएको खुला आक्रमण भन्दै यसले क्षेत्रीय शान्ति र स्थिरतामा प्रत्यक्ष खतरा उत्पन्न गरेको उल्लेख गरेको छ। ‘अफगानिस्तानको भूमिमा पाकिस्तानले गरेको हवाई आक्रमणको भारत कडाइका साथ निन्दा गर्दछ,’ विदेश मन्त्रालयले जारी गरेको विज्ञप्तिमा भनिएको छ, ‘यस आक्रमणमा महिला तथा बालबालिकासहित धेरै निर्दोष नागरिकको मृत्यु भएको छ।’
विदेश मन्त्रालयले पाकिस्तानको यो कदमलाई ‘लापरवाह व्यवहार’ को झल्को भएको र आफ्नो ‘आन्तरिक असफलता’ बाट ध्यान हटाउन यस्ता गतिविधि सञ्चालन गरेको आरोप समेत लगाएको छ। भारतले अफगानिस्तानको सार्वभौमिकता र भौगोलिक अखण्डताको पक्षमा आफ्नो अटल समर्थन पुनः दोहो¥याएको छ। यसअघि पाकिस्तानले आइतबार र सोमबार मध्यरातमा अफगानिस्तानभित्र स्थल तथा हवाई सैन्य अभियान सञ्चालन गरेको जनाएको थियो। पाकिस्तान सरकारका अनुसार ती कारबाहीमा २९ जना चरमपन्थी मारिएका छन्। तर अफगानिस्तानको तालिबान सरकारले भने ती आक्रमणमा बालबालिका र महिलासहित दर्जनौं सर्वसाधारणको मृत्यु भएको दाबी गरेको छ।
