चार पटक विश्वकप विजेता जर्मनीले यस संस्करणमा पाराग्वेसँग पराजित भई ‘अप्रत्याशित’ रुपले प्रतियोगिताबाट बाहिरिएको छ। थप समयसम्म १-१ को बराबरी भएपछि पेनाल्टी शूटआउटको निर्णय भएको थियो। विश्वकप प्रतियोगितामा पहिलो पटक जर्मनी पेनाल्टी शूटआउटमा पराजित भएको घटना हो।
पेनाल्टी शूटआउटमा इङ्लिश प्रिमियर लिग विजेता आर्सनलका फर्वार्ड काइ ह्याभर्ज र न्यूक्यासलका निक वाल्टमेडले गोल गर्न सकेनन्। पाराग्वेका दुई खेलाडीले पनि गोल गर्न नसकेपछि छैटौँ प्रहारमा जर्मनीका जनाथन टाहले पोस्टभन्दा माथि प्रहार गरे, तर पाराग्वेका होजे कनालले मौका गुमाएनन्। आम खेलमा पाराग्वेका जुलियो एन्सिसोले ४२औं मिनेटमा गोल गरि अग्रता लिएका थिए। तर दोस्रो हाफमा जर्मनीले सुधारिएको प्रदर्शन देखायो। ५४औं मिनेटमा काइ ह्याभर्जले गोल फर्काए। पाराग्वेले कडा रक्षा गर्दै खेललाई अतिरिक्त समयमा पुर्यायो।
अतिरिक्त समयमा पनि बराबरी भएपछि पेनाल्टी शूटआउट भएको थियो, जुन सुरुदेखि नै ह्याभर्ज असफल भए। अब शनिबार हुने अन्तिम १६ मा पाराग्वे फ्रान्स वा स्वीडेनसँग प्रतिस्पर्धा गर्नेछ। जर्मनीले सन् १९५४, १९७४, १९९० र २०१४ मा विश्वकप उपाधि जितेको छ। तर पछिल्लो तीन संस्करणमा उपाधि जित्न नसकेको छ। सन् २०१८ र २०२२ मा दुवै पटक जर्मनी समूह चरणबाट अघि बढ्न सकेन। यस पटक समूह चरणबाट अघि बढेर फिफा वरियतामा आफूभन्दा ३१ स्थान तल रहेको पाराग्वेसँग अन्तिम ३२ को नकआउट चरणमा हार्यो।
सोमबार राति भएको अर्को खेलमा ब्राजिलले जापानलाई हराएको छ। खेलको ९५औं मिनेटमा ग्याब्रिअल मार्टिनेलीको गोलले ब्राजिलले २-१ ले जापानलाई पराजित गरेको हो। खेलको पहिलो हाफमा जापानले राम्रो प्रदर्शन गर्दै २९औं मिनेटमा काइशु सानोले पहिलो गोल गरेका थिए। तर दोस्रो हाफको ५६औं मिनेटमा ब्राजिलका कासेमिरोले बराबरी गरेका थिए। ब्राजिलले यसअघि पाँच पटक विश्वकप उपाधि जितिसकेको छ – सन् १९५८, १९६२, १९७०, १९९४ र २००२ मा। अब ब्राजिल अन्तिम १६ को चरणमा नर्वे र आइभोरी कोस्टबीचको खेलको विजेतासँग प्रतिस्पर्धा गर्नेछ।
