रुसले युक्रेनका विभिन्न सहरहरूमा भएको युद्धको पहिलो २४ घण्टाभित्र नै सबैभन्दा ठूलो हवाई हमला गरेको छ। यस अवधिमा उसले ९४८ वटा ड्रोनद्वारा आक्रमण गरेको छ। युक्रेनको वायुसेनाले जनाएको छ कि मंगलबार बिहान ९ बजेदेखि रुसले अनपेक्षित रूपमा आक्रमण सुरु गरेको हो। यस आक्रमणमा कम्तीमा तीन जनाको मृत्यु भएको र दर्जनौँ जना घाइते भएका छन्।
स्थानीय अधिकारीहरूले जानकारी दिएका छन् कि पश्चिमी सहर लभिभमा रहेको सिटी सेन्टरमा विश्व धरोहर युनेस्को संरक्षण क्षेत्रमा पर्ने १६औं शताब्दीको ‘बर्नार्डिन मोनास्ट्री’ क्षतिग्रस्त भएको छ। त्यस्तै नजिकै छिमेकी क्षेत्र इभानो फ्र्यान्किभ्स्कमा रहेको एक प्रसूति अस्पताल पनि आक्रमणमा परेको छ। यसअघि पाँच जनाको मृत्यु भएको अर्को ठूलो आक्रमणपछि यो अर्को ठूलो हवाई हमला हो। युक्रेनले ३९२ ड्रोन र ३४ वटा क्षेप्यास्त्र प्रहार भएको बताएको छ।
मंगलबार साँझ एउटा भिडियो सम्बोधनमा युक्रेनी राष्ट्रपति भोलोदिमिर जेलेन्स्कीले भन्नुभयो, “पछिल्ला आक्रमणहरूको हकमा हेर्दा रुसले यो युद्ध छिट्टै समाप्त गर्ने कुनै योजना नराखेको स्पष्ट देखिन्छ।” लभिभका अधिकारीहरूले मंगलबार पोस्ट गरेको भिडियोमा बर्नार्डिन मोनास्ट्री नजिकै मानिसहरूको बसोबास रहेको भवनको छाना आगो लागेको देखिन्छ। सामाजिक मिडियामा पोस्ट गरिएका विभिन्न दृश्यहरूमा सहरको आकाशमा जमिन नजिक ड्रोन उडिरहेको र मानिसहरूको घरहरूमा प्रहार भएको देख्न सकिन्छ।
लभिभ क्षेत्रका प्रमुख माक्सिम कोजीत्स्कीका अनुसार रुसी आक्रमणमा परेर ३२ जना घाइते भएका छन्। इभानो फ्रान्किभ्स्क सहरमा दुई जनाको मृत्यु भएको र एक ६ वर्षिय बालकसहित चार जना घाइते भएको स्थानीय एक अधिकारीले बताएका छन्। आक्रमणको निशानामा रहेका क्षेत्रमा प्रसूति अस्पतालसहित थुप्रै भवनहरूमा क्षति पुगेको छ। पश्चिमी युक्रेनको अर्को सहर टेरनोपिल पनि मंगलबारको आक्रमणको निशानामा परेको छ। क्षेत्रीय अधिकारीहरूले केही क्षेत्रहरू प्रत्यक्ष आक्रमणमा परेको जनाए पनि त्यहाँ कोही मृत्यु भएको भने खुलाएका छैनन्।
