फिफा विश्वकप २०२६ को विजेताले ५ करोड अमेरिकी डलर अर्थात करिब ७ अर्ब ७० करोड ७० लाख रुपैयाँ पुरस्कार प्राप्त गर्नेछन्। फिफा काउन्सिलले २०२६ विश्वकपका लागि कुल ६५ करोड ५० लाख अमेरिकी डलर पुरस्कार राशि निर्धारण गरिसकेको छ, जुन गत कतार विश्वकपको तुलनामा ५० प्रतिशतले वृद्धि हो। विश्वकपमा सहभागी प्रत्येक राष्ट्रले तयारी खर्चको रूपमा १५ लाख अमेरिकी डलर र प्रतियोगितामा छनोट भएपछि थप १ करोड अमेरिकी डलर पाउने व्यवस्था गरिएको छ।
साविक विजेता अर्जेन्टिना र युरोपेली च्याम्पियन स्पेन फिफा विश्वकप २०२६ को फाइनल खेल्न लागेका छन्। दुवै टोली विश्वकप ट्रफी उठाउन निकै नजिक पुगेका छन्। सोमबार बिहान २३औं संस्करणको विश्वकप विजेताको घोषणा गरिनेछ। च्याम्पियन टोलीले विश्वकप ट्रफीसँगै करोडौं रुपैयाँको पुरस्कार जित्नेछ। यो रकम अमेरिकी डलरमा हुनेछ, जुन नेपाली रुपैयाँमा रूपान्तरण गर्दा अर्बौंमा पुग्छ।
यस पटक विश्वकपमा टोली संख्या ४८ पुगेसँगै पुरस्कार राशि र सहभागी टोलीले पाउने रकममा उल्लेखनीय वृद्धि भएको छ। फिफा काउन्सिलले विश्वकप २०२६ का लागि कीर्तिमानी ६५५ मिलियन (६५ करोड ५० लाख) अमेरिकी डलर पुरस्कार स्वीकृत गरेको छ। विजेताले ५० मिलियन (५ करोड) अमेरिकी डलर पुरस्कार प्राप्त गर्नेछन्। बिहीबारको विनिमयदर १५४.१४ रुपैयाँ अनुसार उक्त रकम करिब ७ अर्ब ७० करोड ७० लाख रुपैयाँ बराबर हुन्छ।
कतार विश्वकपमा उपाधि जित्दा अर्जेन्टिनाले ४ करोड २० लाख अमेरिकी डलर पुरस्कार पाएको थियो। उपविजेताले ३३ मिलियन (३ करोड ३० लाख) अमेरिकी डलर, तेस्रो स्थानले २९ मिलियन (२ करोड ९० लाख), र चौथो स्थानले २७ मिलियन (२ करोड ७० लाख) अमेरिकी डलर प्राप्त गर्नेछन्। विश्वकपमा मात्र विजेताहरू होइन, सबै सहभागी टोलीले पुरस्कार पाउने व्यवस्था छ। ४८ टोलीले नगद पुरस्कार पाउनेछन्।
क्वार्टरफाइनलबाट बाहिरिने टोलीले १९ मिलियन (१ करोड ९० लाख), अन्तिम १६ बाट बाहिरिने टोलीले १५ मिलियन (१ करोड ५० लाख), र राउन्ड अफ ३२ बाट बाहिरिने टोलीले ११ मिलियन (१ करोड १० लाख) अमेरिकी डलर पाउनेछन्। समूह चरणमै बाहिरिने टोलीले पनि ९ मिलियन (९० लाख) अमेरिकी डलर पाउनेछन्। पुरस्कार मात्र नभई विश्वकपमा छनोट भएर खेल्ने टोलीलाई अतिरिक्त रकम पनि प्रदान गरिनेछ। छनोट भएका प्रत्येक राष्ट्रलाई तयारी खर्चको रूपमा १.५ मिलियन (१५ लाख) अमेरिकी डलर र प्रतियोगितामा छनोट भएकालाई थप १० मिलियन (१ करोड) अमेरिकी डलर दिइनेछ।
