कप्तान रोहित र उपकप्तान दीपेन्द्रसहित नेपालका आठ खेलाडी इयू टी-२० बेल्जियममा खेल्न

पहिलो पटक आयोजना हुन लागेको इयू टी-२० लिगमा नेपालका आठ खेलाडीले सहभागिता जनाउने भएका छन्। नेपाली क्रिकेट टोलीका कप्तान रोहित पौडेल गेन्ट ग्लाडियटर्समा क्याटेगोरी ‘बी’ बाट साइन भएका छन्। उपकप्तान दीपेन्द्र लमिछानेलाई जेबी ब्रुग्सले प्रि-साइन गरिसकेको छ भने सन्दीप लामिछाने पनि लियेज रेड लायन्सबाट प्रि-साइन भइसकेका छन्।

आज सम्पन्न ‘ड्राफ्ट’ मार्फत रोहितसहित अन्य चार खेलाडी विभिन्न टोलीमा अनुबन्ध भएका छन्। अनिल साह र गुल्शन झा अप्सनल राउन्डबाट छनोट भएका छन्। विकेटकीपर आसिफ शेख क्याटेगोरी ‘सी’ बाट एन्टवर्प एंकर्समा अनुबन्ध भएका छन्। ललित राजवंशी र इशान पान्डेलाई पनि जेबी ब्रुग्सले ड्राफ्ट गरेको छ।

लिगका लागि २२ नेपाली खेलाडीले नाम दर्ता गराएका छन्। प्रि-साइन र ड्राफ्ट भइसकेका खेलाडीहरू बाहेक कुशल भुर्तेल, आरिफ शेख, करण केसी, सोमपाल कामी, आदित्य महता, शेर मल्ल, लोकेश बम, विनोद भण्डारी, शरद भेषावकर, आदिल आलम, सन्तोष यादव, कुशल मल्ल, भीम सार्की, शाहब आलम, गुल्शन झा र पवन सर्राफ पनि छन्।

ललित, आसिफ र इशानका लागि यो नेपालबाहिर खेल्ने लिगको पहिलो अनुभव हुनेछ। कप्तान रोहित, दीपेन्द्र र सन्दीपले पहिले नेपालबाहिर फ्रेन्चाइज लिग खेलिसकेका छन्। प्रत्येक टोलीमा कम्तीमा ४ जना बेल्जियन खेलाडी हुनुपर्ने नियम छ र हालसम्म कुल १२ खेलाडी चयन भइसकेका छन्।