समाचार सारांश नवनियुक्त प्रधानमन्त्री बालेन साहको नेतृत्वमा स्थायी राजनीतिक वातावरणको निर्माण भएपछि निजी क्षेत्रले लगानी बढ्ने अपेक्षा गरेको छ। अर्थमन्त्री डा. स्वर्णिम वाग्लेले निजी क्षेत्रसँग सहकार्य गर्दै पुराना कानुन खारेज गर्ने र लगानीमैत्री वातावरण बनाउने प्रतिबद्धता व्यक्त गरेका छन्। नेपाल उद्योग वाणिज्य महासंघका अध्यक्ष चन्द्र ढकालले नयाँ सरकारप्रति विश्वास व्यक्त गर्दै आर्थिक पुनरुत्थान र दिगो विकासमा गति आउने बताएका छन्। १३ चैत, काठमाडौं। जेनजी आन्दोलनबाट प्रभावित निजी क्षेत्र नयाँ सरकारको गठनपछि उत्साहित भएको छ। स्थायी सरकारको अभावमा लगानीमैत्री वातावरणको कमी भोगिरहेको निजी क्षेत्रले राजनीतिक स्थायित्वको संकेत पाएपछि सकारात्मक प्रतिक्रिया देखाएको छ। नयाँ सरकार गठनपछि उद्यमीहरूले लगानी बढ्ने विश्वास लिएका छन् भने सरकारले पनि तदनुसार समन्वय गरेर अघि बढ्ने अपेक्षा गरेका छन्।
नवनियुक्त अर्थमन्त्री डा. स्वर्णिम वाग्लेले निजी क्षेत्रसँग सहकार्य गर्दै अघि बढ्ने बताएका छन्। उनले निजी क्षेत्रको मनोबल बलियो बनाउन काम गर्ने जिम्मेवारी आफूले लिएको बताएका छन् र यसले उद्यमी तथा व्यवसायीहरूलाई सकारात्मक बनाएको छ। उनले पुराना कानुनहरू खारेज गर्ने प्रतिबद्धता जनाउँदै भने, ‘निजी क्षेत्रलाई विश्वासमा राखेर अगाडि बढ्न सरकारले उपयुक्त वातावरण सिर्जना गर्नेछ।’ राज्यका केही संरचनाहरू जुन उद्योगी व्यवसायीलाई निरुत्साहित गर्ने काम गर्थे, तिनलाई पनि खारेज गर्ने उनले बताए।
प्रधानमन्त्री बालेन साह ४० वर्षभन्दा कम उमेरका हुनु भएकाले नवयुवाहरूमा उत्साह फैलिएको छ, नेप्लिज योङ आन्ट्रप्रेनर फोरमका अध्यक्ष सुदीप घिमिरेले बताए। उनले युवा नेतृत्वको सरकारले आगामी दिनमा युवाकारक व्यवसायी संस्थाहरूको सुझाव र सल्लाह लिने अपेक्षा व्यक्त गरे। घिमिरेले भने, ‘युवा उद्यमी संघसंस्थाहरूलाई प्रोत्साहन गर्नुपर्छ, नीति निर्माणमा युवालाई पनि समावेश गर्नुपर्छ, यही सबैभन्दा ठूलो आशा र अपेक्षा हो।’ उद्योग–व्यवसायका लागि बाधा बनिरहेका केही ऐनहरू खारेज गर्ने कुरा स्वागतयोग्य रहेको उनका भनाइ छ।
‘स्थायी सरकारले भएर युवा उद्यमीलाई विश्वास, भरोसा र आशा दिने वातावरण सिर्जना गरेको छ,’ उनले भने, ‘यसले देशलाई आर्थिक रूपमा सबल बनाउन सहयोग पुर्याउनेछ।’ सरकारले व्यवसायीको क्षेत्र अनुसारका समस्या समाधान गर्नुपर्ने र त्यसका लागि डिजिटल शासन कार्यान्वयनमा ल्याउने विश्वास घिमिरेले व्यक्त गरे। यस सरकारले डिजिटल, आतिथ्य, पर्यटन, शिक्षा लगायत सेवा निर्यातका लागि उपयुक्त वातावरण बनाउने अपेक्षा गरिएको छ।
युवा नेतृत्व भएको नयाँ सरकारले उद्यमीहरूका लागि अवसर सिर्जना गर्ने अपेक्षा उद्योग परिसंघ युवा उद्यमी फोरमका अध्यक्ष मनिष श्रेष्ठले व्यक्त गरेका छन्। श्रेष्ठले भने, ‘उद्यम–व्यवसाय गर्न सहज बनाउनुपर्छ भने साना साना समस्याहरू हटाउनुपर्छ।’ कम्पनी दर्तादेखि अनुमति प्रक्रियासम्म झन्झट कम भए प्रत्यक्ष वैदेशिक लगानी पनि बढ्ने उनको भनाइ छ। सरकारले आफ्ना योजना कार्यान्वयन गरेमा सरकारी खर्च बढ्ने र यसले उद्योग–व्यवसायलाई सकारात्मक प्रभाव दिने बुझाइ सरकारको हुनुपर्ने उनको सोच छ।
‘पूर्वमा राजनीतिक अस्थिरता र लगानीमैत्री वातावरणको कमी थियो, आवश्यक कच्चापदार्थ सिमाना नजिकबाट सजिलै ल्याउन सकिए पनि अनावश्यक झन्झटले उत्पादन लागत बढ्ने समस्या देखिएको थियो,’ उनले भने, ‘आफैंले उत्पादन गरेर वस्तु र सेवा बजारसम्म पुर्याउँदा थप चुनौतीहरू हुन्छन्, ती हटाउन जरुरी छ।’ स्वदेशी उद्यम–व्यवसाय बचाउन सीमा क्षेत्रलाई प्रभावकारी नियमन गर्नुपर्ने उनी बताउँछन्। एकै सरकार पाँच वर्ष सञ्चालन हुँदा लगानीमा बढोत्तरी हुनेमा उनी विश्वस्त छन्। अहिलेको सरकारले प्रत्येक युवा उद्यमी लगानी विस्तार गर्न सक्ने वातावरण बनाउन सक्नेमा उनी आशावादी छन्।
अर्थमन्त्री उद्यम भावना बुझ्ने व्यक्ति भएकाले निजी क्षेत्रलाई प्रोत्साहित गर्नेमा उनी ढुक्क छन्। नेपालका नयाँ प्रधानमन्त्री बालेन साह नेतृत्वको सरकारप्रति समर्थन र विश्वास रहेको बताउँदै सीजी हस्पिटालिटी ग्लोबलका प्रबन्ध निर्देशक तथा कार्यकारी अधिकृत राहुल चौधरीले स्थायी राजनीतिक वातावरणमा लगानी बढ़्ने बताएका छन्। नेपाल उद्योग वाणिज्य महासंघका अध्यक्ष चन्द्र ढकालले नवनियुक्त प्रधानमन्त्री साहलाई बधाई तथा सफल कार्यकालको शुभकामना दिँदै राजनीतिक र नीतिगत स्थिरता हासिल हुने बताए। ढकालले भने, ‘लगानीमैत्री नीतिहरूको प्रवर्द्धन, आर्थिक पुनरुत्थान र दिगो विकासमा तीव्रता आउने छ। समग्र अर्थतन्त्रको मेरुदण्ड रहेको निजी क्षेत्रसँग सहकार्य गर्दै समृद्धिको यात्रा अगाडि बढाइनेछ।’
