सञ्चारमन्त्रीद्धारा कर्मचारीहरुलाई निर्देशन- धेरै अपेक्षा छन्, जनतामा अनुभूति हुनेगरी काम गर्नुस्
१४ चैत, काठमाडौं । सञ्चार तथा सूचना प्रविधि मन्त्री डा. विक्रम तिमिल्सिनाले कर्मचारीहरुलाई जनताले छिट्टै अनुभव गर्ने गरी काम गर्न निर्देशन दिएका छन्।
शनिवार मन्त्रालयको कामकाजबारे जानकारी लिँदै सञ्चार मन्त्री तिमिल्सिनाले सञ्चार मन्त्रालयलाई सरकारको अनुहार तथा नागरिकसँग प्रत्यक्ष सम्बन्ध राख्ने मन्त्रालय भएको बताए र जनतामा छिटो लाभ र परिणाम ल्याउने गरी काम गर्न आग्रह गरे।
‘देशमा नयाँ राजनीतिक परिवेश आएको छ। निर्वाचनले हामीलाई अभूतपूर्व ‘म्यान्डेट’ दिएको छ। जनताका अपेक्षाहरू पनि धेरै छन्,’ उनले भने, ‘त्यसैले सरकारले जनताले छिट्टै अनुभूति गर्ने गरी काम गर्नुपर्छ।’
मन्त्रीले नवगठित सरकारको भावना अनुसार जनतालाई केन्द्रमा राखेर सरल, छिटो र छरितो सेवा प्रवाह सुनिश्चित गर्न जोड दिए। ‘सेवा छिटो र छरितो हुनुपर्छ। कुनै विवादित काम हुन नदिनुपर्छ,’ उनले भने।
सेवाग्राहीले समस्या महसुस गर्नु अघि नै समाधान प्रदान गर्नुपर्नेमा उनले जोड दिए। ‘जनभावनाको सम्मान गर्दै देशले खोजेको बाटोमा मुलुकलाई अगाडी बढाउन सबैले योगदान दिनुपर्छ,’ उनले थपे।
सञ्चार मन्त्रालयले तत्काल सुधार र दीर्घकालीन कार्ययोजना लिएर उच्चपदस्थ अधिकारीसँग अघि बढ्नुपर्ने बताउँदै मन्त्रीले मन्त्रालयलाई नमूना मन्त्रालय बनाउनुपर्ने दिशामा काम गर्नुपर्नेमा जोड दिए।
