अञ्जन विष्टले आफ्नै प्रशिक्षण केन्द्र स्थापना गरे, ‘नेक्स्ट जेन बुट क्याम्प’ आयोजना हुँदै

राष्ट्रिय फुटबल टोलीका स्ट्राइकर अञ्जन विष्टले ललितपुरमा ‘अञ्जन विष्ट ट्रेनिङ सेन्टर’ स्थापना गरी ८ देखि १६ वर्षका खेलाडीका लागि १० दिने ‘नेक्स्ट जेन बुट क्याम्प’ सञ्चालन गर्ने घोषणा गरेका छन्। क्याम्प चैत्र २१ देखि ३० गतेसम्म बुद्धिविकास फुटबल मैदानमा सञ्चालन हुनेछ र एएफसी तथा फिफा प्रमाणित प्रशिक्षक लगायत विदेशी प्रशिक्षकले प्रशिक्षण दिनेछन्। अञ्जन विष्टले भने, ‘मैले सिकेको अनुशासन, कडा परिश्रम र समर्पण नै सफलताको सूत्र हो’ र ‘जबसम्म हामी छौं, फुटबल पनि जीवितै रहन्छ’।

मंगलबार आयोजित पत्रकार सम्मेलनमार्फत उनले ‘अञ्जन विष्ट ट्रेनिङ सेन्टर’को घोषणा गर्दै युवा लक्षित ‘नेक्स्ट जेन बुट क्याम्प’ सञ्चालन हुने जानकारी दिए। १० दिने बुट क्याम्प चैत्र २१ देखि ३० गतेसम्म ललितपुरको बुद्धिविकास फुटबल मैदानमा सञ्चालन गरिनेछ। ८ देखि १६ वर्ष उमेर समूहका खेलाडीहरूलाई लक्षित गर्दै आयोजना हुने क्याम्पमा दैनिक विहान ८ देखि १० बजेसम्म प्रशिक्षण दिइनेछ। क्याम्पमा एएफसी र फिफा प्रमाणित प्रशिक्षकहरू सहित विदेशी प्रशिक्षकको पनि सहभागिता रहने आयोजकले जानकारी दिएका छन्।

प्रशिक्षणमा आधारभूत सीपदेखि खेल अनुशासन, मेहनत र सहनशीलता जस्ता पक्षमा विशेष जोड दिइनेछ। क्याम्पको अन्त्यमा अभ्यास तथा फाइनल खेल पनि गरिनेछ। सहभागीहरूले राष्ट्रिय खेलाडीसँग भेटघाट गर्ने अवसर पाउनेछन्। क्याम्पमा सहभागिताका लागि ८,५०० रुपैयाँ शुल्क तोकिएको छ, जसमा जर्सी, खाजा, प्रमाणपत्र र अन्य उपहार उपलब्ध गराइनेछन्। पत्रकार सम्मेलनमा बोल्दै विष्टले आफ्नो लक्ष्य केवल खेलाडी उत्पादन मात्र नभई सफलताको मार्ग सिकाउने रहेको बताए। ‘१० दिनमा अनुशासन र हार पछि जित्ने आत्मविश्वास विकास गराउने हाम्रो उद्देश्य हो।’ विष्टले आफू अझै केही वर्ष उच्च स्तरमै खेल्ने बताए। साथै, नेपाली फुटबल चुनौतीपूर्ण अवस्थामा रहे पनि समाप्त नहुने धारणा व्यक्त गरे। ‘जबसम्म हामी छौं, फुटबल पनि जीवितै रहन्छ’ उनले भने।