चार पटकको विश्व विजेता इटलीले सन् २०२६ को फिफा विश्वकप छनोटमा पुनः असफलता ब्यहोरेको छ। बोस्निया एण्ड हर्जगोभिनासँग पेनाल्टी सुटआउटमा ४-१ ले पराजित भएपछि इटली लगातार तेस्रो पटक विश्वकप छनोट हुन नसकेको हो। बोस्निया एण्ड हर्जगोभिनाले यो अवसर १४ वर्षपछि पाएको बताइएको छ। १८ चैत, काठमाडौं । चार पटक विश्व च्याम्पियन बनेको इटलीले फिफा विश्वकप छनोटमा फेरि असफलता सामना गरेको छ। सन् २०२६ मा संयुक्त रुपमा अमेरिका, क्यानडा र मेक्सिकोमा आयोजना हुँदै गरेको विश्वकपका लागि मंगलबार राति सम्पन्न युरोपेली प्लेअफमा इटली बोस्निया हर्जगोभिनासँग पेनाल्टी सुटआउटमा ४-१ ले पराजित भयो र लगातार तेस्रो पटक विश्वकप छनोट गर्न सकेन। इटलीले सन् २०१८ र २०२२ मा समेत विश्वकप छनोट गर्ने अवसर गुमाएको थियो र दुवै पटक प्लेअफ चरणमै पराजित भएको थियो। बोस्नियाको स्टाडियम बिलिनो पोल्जेमा सम्पन्न खेलमा, इटलीले सुरुवाती तीन पेनाल्टी मध्ये दुई गोल गर्न असमर्थ भए र हार व्यहोर्न बाध्य भयो। हारपछि इटलीका प्रशिक्षक गेनारो गटुसोले यस स्थितिलाई स्वीकार्न कठिन भएको र यसले उनको मन दुःखाएको प्रतिक्रिया दिएका छन्। निर्धारित समयको खेल १-१ गोल बराबरीमा सकिएपछि नतिजा पेनाल्टी सुटआउट मार्फत तय गरिएको थियो। माइकल केनले १५औं मिनेटमा गोल गर्दै इटलीलाई अग्रता दिलाएका थिए। तर एलेसान्द्रो बास्टोनीले ४१औं मिनेटमा रातो कार्ड पाएपछि टोली १० खेलाडीमा सिमित भयो। बोस्नियाका हरिस ताभाकोभिचले ७९औं मिनेटमा बराबरी गोल फर्काए। ४० वर्षे कप्तान एडेन जेकोको नेतृत्वमा रहेको बोस्निया एण्ड हर्जगोभिनाले समग्रमा दोस्रो तथा सन् २०१४ पछिको पहिलो पटक फिफा विश्वकप छनोट गरेको हो। १४ वर्षपछि पुनः विश्वकपमा स्थान बनाएको बोस्नियाले अब समूह ‘बी’ मा क्यानडा, कतार र स्विट्जरल्याण्डसँग प्रतिस्पर्धा गर्नेछ।
