मकवानपुरको हेटौंडा उपमहानगरपालिका-९ गुम्बाचोकस्थित पूर्व-पश्चिम राजमार्गमा दुई मोटरसाइकलहरू ठोक्किँदा एकता वैद्यको मृत्यु भएको छ। दुर्घटनामा घाइते भएका मोटरसाइकल चालक रोनिक कार्की र पुष्पलाल गुरुङलाई उपचार जारी छ। दुर्घटनामा संलग्न ट्रक चालक बद्री गडरिया अहिले प्रहरीले नियन्त्रणमा लिएका छन्। १८ चैत, हेटौंडा।
मकवानपुरको हेटौंडा उपमहानगरपालिका-९ गुम्बाचोकस्थित पूर्व-पश्चिम राजमार्गमा बुधबार भएको सवारी दुर्घटनामा एकजनाको मृत्यु र दुईजनाको घाइते हुने घटनाको विवरण मकवानपुर प्रहरीले प्रकाशित गरेको छ। हेटौंडाबाट रातोमाटेतर्फ जाैँदै गरेको प्रदेश ३-०२-००७ प ७६८३ नम्बरको मोटरसाइकल र विपरीत दिशाबाट आउँदै गरेको ना ४४ प ९३५४ नम्बरको मोटरसाइकल एकअर्कामा ठोक्किँदा दुर्घटना भएको पुष्टि गरिएको छ।
दुर्घटनामा प्रदेश ३-०२-००७ प ७६८३ नम्बरको मोटरसाइकलमा पछाडि सवार हेटौंडा-९ निवासी १८ वर्षीया एकता वैद्यको मृत्यु भएको छ। मोटरसाइकलसँग ठक्कर दिएपछि मृतक वैद्य सोही दिशाबाट आउँदै गरेको ना ६ ख ३१४५ नम्बरको सिमेन्ट बोकेको ट्रकमा ठोक्किइन् जसका कारण उनको टाउको र शरीरका अन्य भागमा गम्भीर चोट लागेको थियो। उनको हेटौंडा अस्पतालमा उपचारको क्रममा मृत्यु भएको हो।
दुर्घटनामा सोही मोटरसाइकलका चालक हेटौंडा-४ कर्रा निवासी १९ वर्षीय रोनिक कार्की सामान्य घाइते भएका छन् भने अर्काे मोटरसाइकल चालक चितवन इच्छाकामना गाउँपालिका-५ बदेलटार निवासी २१ वर्षीय पुष्पलाल गुरुङ मध्यम घाइते भएका छन्। जिल्ला प्रहरी कार्यालय मकवानपुरले जानकारी दिएको छ। यस दुर्घटनामा संलग्न ट्रक चालक बाँके कोहलपुर नगरपालिका-१४ निवासी ३३ वर्षीय बद्री गडरिया प्रहरीले नियन्त्रणमा लिएका छन्।
