१८ चैत, काठमाडौं । नेपाली कांग्रेसका पूर्व उपसभापति विमलेन्द्र निधिले विशेष महाधिवेशन अवैध भएको भन्दै त्यसलाई आफूहरूले मान्यता नदिने बताएका छन् । बुधबार पूर्णबहादुर खड्का र डा. शेखर कोइराला पक्षधरहरूसँगको छलफलपछि पत्रकारसँग संवाद गर्दै निधिले आफूहरूलाई मात्र वैध कांग्रेस रहेको दावी गर्दै निर्वाचन आयोगको निर्णयलाई स्वीकार नगरी सर्वोच्च अदालतमा मुद्दा दायर गरिएको बताए । उनले खड्काको नेतृत्वमा ‘कार्यवाहक सभापति’ को रूपमा हिजो र आज दुई दिन लगातार ‘केन्द्रीय समिति’को बैठक पनि सञ्चालन गरिएको दाबी गरे।
‘२२ गते सर्वोच्च अदालतमा मुद्दाको पेसी छ । निर्वाचन आयोगले विशेष महाधिवेशन पक्षधरलाई मान्यता दिएको छ, तर त्यो अवैध, गैरकानुनी र राजनीतिक रूपमा उपयुक्त नभएकोले हामीले सर्वोच्च अदालतमा मुद्दा दायर गरेका छौं,’ निधिले भने, ‘विशेष महाधिवेशन हामीले मान्यता दिएका छैनौं र सहभागी पनि भएका छैनौं ।’ बैठकमा मुद्दाको सम्पूर्ण तयारीका विषयमा पनि छलफल भएको निधिले जानकारी दिए।
‘कानुनी परामर्शदाता र अधिवक्ताहरू बहसका लागि तयार छन् र हामीले त्यसबारे पनि विचार-विमर्श गरिरहेका छौं,’ उनले थपे । साथै, निधिले आफूहरू उपस्थित कांग्रेसलाई मात्रै वैध रहेको दाबी पनि गरे । ‘हामी नै वास्तविक कांग्रेस हौँ, जहाँ हामी छौं त्यही नै असली कांग्रेस हो । यही निष्कर्षमा हामी पुगेका छौं,’ निधिले स्पष्ट पार्नुभयो।
बैठकमा निर्वाचन सम्बन्धी विषयमा समेत छलफल भएको निधिले बताए । उनले भने, ‘जस परिस्थितिमा निर्वाचन सम्पन्न भयो, त्यसको परिणाम अकल्पनीय रह्यो । निर्वाचन आकस्मिक रूपमा २०८२ सालमा भयो, जबकि यो २०८४ मा हुनु पर्ने थियो । संविधानको रक्षा गर्न निर्वाचनमा हामी सहभागी भएका थियौं र त्यसको समीक्षा पनि गरियो ।’ देशको समसामयिक राजनीतिक विषयमा पनि छलफल भएको निधिले उल्लेख गरे। ‘यस विषयमा नेपाली कांग्रेसले पहिलेभन्दा बढी सशक्त तरिकाले लोकतान्त्रिक प्रणालीलाई अघि बढाउने विषयमा विचार विमर्श भयो,’ उनले भने, ‘त्यसका लागि व्यापक एकताको आवश्यक छ र हामी यहीलाई हाम्रो मिशन बनाउने छौं । देशभरि रहेका साझेदारहरूसँग संवाद जारी राख्ने योजना छ ।’ पार्टी एकताका पक्षमा विशेष महाधिवेशन पक्षधरहरू पनि तयार हुनु पर्ने निधिको भनाइ थियो।
