२२ चैत, धनगढी। सशस्त्र प्रहरी बल नेपालका महानिरीक्षक (आईजीपी) राजु आर्यालले सीमा क्षेत्रमा हुने अपराध, तस्करी र सुरक्षाकर्मीमाथि हुने आक्रमणप्रति शून्य सहनशीलता अपनाउन निर्देशन दिएका छन्। कैलालीको अत्तरियामा आइतबार आयोजित सशस्त्र प्रहरी बल नेपाल नम्बर ७ वैद्यनाथ बाहिनीको २५ औं स्थापना दिवसमा सम्बोधन गर्दै आईजीपी आर्यालले अपराध तथा चोरी, तस्करीमा संलग्न कुनै पनि व्यक्तिलाई कारवाहीको दायरामा ल्याउनुपर्ने बताए। ‘अपराधी र तस्करलाई माया गर्ने होइन, कानुनले ठोक्ने हो,’ आर्यालले भने।
कैलालीको खक्रौलामा रहेको सशस्त्र प्रहरीको बीओपीभित्र प्रवेश गरेर तत्कालीन डीएसपी प्रदीप पौडेलसहितमाथि भएको आक्रमण जस्ता घटना पुनः नदोहोरिन निर्देशन समेत दिएका छन्। उक्त घटनालाई सशस्त्र प्रहरीले गम्भीर रुपमा लिएको बताउँदै आर्यालले यस्तो अवस्थामा कानुनले बल प्रयोग गर्न नरोकेको स्पष्ट पारेका छन् भने सशस्त्रका युनिटभित्र घुसेर लुटपाट, हतियार खोस्ने वा सुरक्षाकर्मीमाथि आक्रमण गर्नेविरुद्ध तत्काल प्रतिवाद गर्ने निर्देशन दिएका छन्।
‘सीमा सुरक्षा गुल्म खक्रौलाको भित्र पसेर गैरकानुनी हर्कत भएको छ। यो कुरालाई संगठनले गम्भीर रुपमा हेरेको छ,’ आर्यालले भने, ‘यस्तो अवस्थामा बल प्रयोग गर्ने कुरामा कानुनले तपाईलाई छेकेको छैन। हतियार लुट्न आउने, डाका गर्न आउनेलाई प्रतिवाद गर्ने, ज्यान तलमाथि भएपनि कानुनले छेकेको छैन।’ उनले खक्रौलाजस्ता घटना पुनः नदोहोरिन सचेत गराएका छन् भने घटनाका बेला रमिते भएर फोटो खिचेर बस्ने सशस्त्र प्रहरीलाई निलम्बन गरी कारवाही गरिने पनि बताएका छन्।
खक्रौलामा सामान बरामद गर्न विवाद हुँदा एक समूहले गुल्मभित्रै प्रवेश गरेर गुल्मपति डीएसपी प्रदीप पौडेलसहितमाथि आक्रमण गरेको थियो। उक्त घटनापछि डीएसपीसहित घटनाको बेला गुल्ममा उपस्थित सबैलाई हटक्वाटर तानेर छानबिन सुरु गरिएको छ। वैद्यनाथ बाहिनीको स्थापना दिवसमा आईजीपी आर्यालले २१ फागुनमा सम्पन्न प्रतिनिधि सभा सदस्यको निर्वाचन शान्तिपूर्ण र भयमुक्त वातावरणमा सम्पन्न गर्न भूमिका खेल्नुलाई समेत प्रशंसा गरेका थिए। सशस्त्र प्रहरीको मुख्य कार्यादेश सीमासुरक्षा, आन्तरिक सुरक्षा, राजश्व चुहावट नियन्त्रण तथा विपद् व्यवस्थापनका काममा अभूतपूर्व योगदान रहेको आर्यालले बताए। गोदावरी नगरपालिका–१ मा रहेको सशस्त्र प्रहरी बल नेपाल नम्बर ७ वैद्यनाथ बाहिनी स्थापना भएको आइतबार २५ वर्ष पुगेको छ। २२ चैत २०५८ मा बाहिनी स्थापना गरिएको थियो। निमित्त बाहिनीपति सशस्त्र प्रहरी वरिष्ठ उपरीक्षक (एसएसपी) दिग विजय सुवेदीको अध्यक्षतामा आयोजना गरिएको स्थापना दिवसको विशेष समारोहका प्रमुख अतिथि आईजीपी आर्याल थिए। स्थापना दिवसको अवसरमा बाहिनीले उत्कृष्ट कार्य गर्ने विभिन्न प्रदेशका सशस्त्र प्रहरीलाई प्रशंसापत्र सहित सम्मान पनि गरेको छ।
