१५औं महाधिवेशनबाट पार्टीलाई नयाँ पुस्तामा जिम्मेवारी हस्तान्तरण गर्नुपर्छ : दिलेन्द्र बडू

२३ चैत, काठमाडौं । नेपाली कांग्रेसका नेता दिलेन्द्रप्रसाद बडूले नेता तथा कार्यकर्तालाई १५औं महाधिवेशनमा सक्रीय सहभागिता जनाएर पार्टीलाई सुदृढ, पूर्ण अनुशासित र एकताबद्ध बनाउनुपर्ने र नयाँ पुस्तालाई पार्टीको जिम्मेवारी सुम्प्नुपर्नेमा जोड दिएका छन्। सोमबार सामाजिक सञ्जाल फेसबुकमार्फत जारी गरेको विज्ञप्तिमा उनले पार्टीको सार्वजनिक कार्यतालिकाअनुसार १५औं महाधिवेशनतर्फ अगाडि बढ्न नेता तथा कार्यकर्तालाई आग्रह गरेको जनाएका छन्।
‘लोकतन्त्र र प्राप्त उपलब्धिहरूलाई चुनौती बढिरहेको यो समयमा, रचनात्मक र जिम्मेवार प्रतिपक्षको रुपमा लोकतन्त्रको मार्गमा नयाँ पुस्तालाई अगाडि बढाउन आवश्यक भएकाले नेपाली कांग्रेसलाई थप बलियो, अझ जिम्मेवार र एकजुट हुन आवश्यक छ’, विज्ञप्तिमा उल्लेख गरिएको छ।
पार्टीको सर्वोच्च अदालतको व्याख्या र आदेश जे भए पनि सबैलाई मान्य हुने उल्लेख गर्दै उनले भने, ‘त्यसको प्रतिक्षामा रहेर निर्वाचन प्रक्रिया र पृष्ठभूमि खोतलेर वा विशेष अधिवेशन हुँदा नगर्दा आउन सक्ने सम्भावित परिणामका बारे काल्पनिक विश्लेषणमा उल्झिएर समय नष्ट गर्नु उपयुक्त होइन।’
पार्टीभित्रका आन्तरिक कमजोरी साथै मतदाताको बदलिँदो चाहनाका कारण निर्वाचन नतिजा आशाअनुरूप नआएको र यो नतिजा ऐतिहासिक रूपमा कमजोर भएको बडूले बताए। ‘यो तितो सत्य हो। वर्तमान अवस्थामा यस यथार्थलाई स्वीकार गर्दै पार्टी सभापतिको तर्फबाट परिणामको नैतिक जिम्मेवारी सार्वजनिक रूपमा स्वीकार भइसकेको छ,’ उनले लेखेका छन्।