आजभोलि कक्षाकोठा प्रविधिमैत्री हुनुपर्ने आवश्यकता बढ्दो छ। तर धेरैजसो विद्यालय तथा कक्षाहरू प्रविधिमैत्री छैनन्। कतिपय शिक्षकलाई प्रविधिको ज्ञान नहुनु र कतिपय स्थानमा प्रविधिको पहुँच नहुनु जस्ता चुनौतिहरू छन्। यस्ता अवस्थामा वर्तमान समयमा पठनपाठनसँग सम्बन्धित विभिन्न उपकरणहरूको परिचय गराउँदै शिक्षकहरूलाई जानकारी गराउन ‘डिजिटल एन्ड वियोन्ड’ का सह-संस्थापक सगुन ढुङ्गाना तथा उनका टोली लागिपरेका छन्। ढुङ्गाना र उनको टोलीले गुगल सर्टिफाइड एजुकेटर प्रशिक्षण प्रदान गर्दै आएका छन्। हालै नयाँ बानेश्वरस्थित काव्या विद्यालयका शिक्षकहरूलाई पनि प्रशिक्षण दिइएको छ। प्रशिक्षक ढुङ्गानाका अनुसार शिक्षकहरूले लेभल १ (प्रारम्भिक) र लेभल २ (उन्नत) तहको तालिम हासिल गरिसकेका छन्। तालिमपछि शिक्षकहरूले गुगलका विभिन्न टुल्सहरू प्रयोग गरेर शिक्षण र सिकाइलाई व्यवस्थित र प्रभावकारी बनाउन सक्षम हुनेछन्। साथै इच्छुक शिक्षकहरूले सर्टिफाइड ट्रेनर वा इनोभेटर बन्न सक्ने अवसर पनि प्राप्त गर्दछन्।
उक्त टोलीले विज्ञान विषय पढ्न र पढाउन सजिलो हुने विभिन्न डिजिटल टुल्सहरूको जानकारी दिएका थिए। तीमध्ये केहि महत्वपूर्ण वेबसाइटहरू तल प्रस्तुत छन्। १. स्विच जू (Switch Zoo): १४० भन्दा बढी जनावरहरूको बारेमा जानकारी प्राप्त गर्न सकिने अनलाइन प्लेटफर्म हो। वेबसाइटमा समावेश जानकारी अनुसार १४२ भन्दा बढी जनावरहरूको विवरण पाइन्छ। यहाँ गेम खेल्दै ती जनावरहरूको बारेमा सिक्न सकिन्छ र जनावरका आवाजहरूलाई संगीतमा पनि सुन्न सकिन्छ। २. सान डिएगो जू वाइल्डलाइफ एक्सप्लोरर (San Diego Zoo Wildlife Explorer): यहाँ जनावरहरूको बसोबास, आहार, शारीरिक बनावट लगायत विभिन्न जानकारी इन्टरएक्टिभ तरीकाले बुझ्न सकिन्छ। ३. केमीकुल (Chemicul): विज्ञान विषय, विशेष गरी रसायन विज्ञानलाई सरल बनाउने वेब प्लेटफर्म हो। पिरियोडिक टेबलमा रहेका पृथ्वीमा पाइने ११८ तत्वहरूको विस्तृत जानकारी यो साइटमा उपलब्ध छ। ४. नासा किड्स क्लब (NASA Kids Club): अन्तरिक्ष सम्बन्धी जानकारी प्राप्त गर्न इच्छुक बालबालिकाका लागि यो प्लेटफर्म अत्यन्त प्रभावकारी छ। ५. बायो डिजिटल लाइब्रेरी (Bio Digital Library): मानव शरीरको रहस्य र संरचनाबारे विस्तृत र सजिलो जानकारी प्रदान गर्ने डिजिटल प्ल्याटफर्म हो। ६. साइन्स जर्नल फर किड्स (Science Journal for Kids): बालबालिकालाई लक्षित विज्ञान जर्नलका रूपमा सेवा दिँदै आएको वेबपोर्टल हो। ७. द साइज अफ स्पेस (The Size of Space): अन्तरिक्षको विशालता र यसको वैज्ञानिक पक्षहरू बुझ्न इच्छुक सबैका लागि रोमाञ्चक र जानकारीमूलक प्रश्नहरूको उत्तर दिन डिजाइन गरिएको साइट हो।
