सन् २०२६ अप्रिलमा पाकिस्तानले अमेरिका र इरानबीच हुने युद्धलाई दुई हप्ताका लागि रोक्न युद्धविराम गराउन सफल भयो। पाकिस्तानी प्रधानमन्त्री शहबाज शरीफ र सेना प्रमुख आसिम मुनीरले अमेरिकी राष्ट्रपति डोनाल्ड ट्रम्पलाई युद्ध स्थगित गर्न अनुरोध गरेपछि ट्रम्पले आक्रमण दुई हप्ताका लागि स्थगित गरे। इस्लामावाद सम्झौताले तत्काल युद्धविराम, होर्मुज जलमार्ग पुनः सञ्चालन गर्ने र इस्लामावादमा प्रत्यक्ष वार्ताको व्यवस्था गरेको छ। २५ चैत, काठमाडौं।
विश्व राजनीतिमा यस्तो दुर्लभ क्षण धेरै कम देखिने गर्छ, जहाँ सानो मुलुकले विश्वका महाशक्तिहरूबीच गर्न लागिएको विनाशकारी युद्धलाई रोक्न सफल हुन्छ। सन् २०२६ को अप्रिलको पहिलो हप्ता विश्वले त्यसैगरी एउटा महत्त्वपूर्ण र ऐतिहासिक घटना देख्यो। अमेरिकी राष्ट्रपति डोनाल्ड ट्रम्पले इरानमाथि मंगलबार राति तत्काल सैन्य आक्रमण गर्न लागेको घोषणा गर्दा ‘‘सम्पूर्ण सभ्यता नै सिध्याइदिने’’ चेतावनी दिएका थिए। यस खबरले विश्वलाई स्तब्ध बनायो र इरानका करोडौँ नागरिकहरू रातभर जाग्राम बस्न बाध्य भए।
यस्तो अत्यन्त जटिल र भयावह परिस्थितिमा पाकिस्तानका प्रधानमन्त्री शहबाज शरीफ र सेना प्रमुख आसिम मुनीरको निरन्तर कूटनीतिक प्रयासले उक्त आक्रमण टार्न सफल भयो। फलस्वरूप, इरान र अमेरिकाबीच दुई हप्ताका लागि युद्धविराम घोषणा भयो र यस घटनाले इस्लामावादलाई विश्व शान्तिको केन्द्रका रूपमा स्थापित गरिदियो। यसै अवधिमा, दक्षिण एसियाको ठूलो लोकतन्त्र र आफूलाई ‘विश्वगुरु’ दावी गर्ने भारतको सामना गर्दै पुरानो प्रतिद्वन्द्वी पाकिस्तानले यस्तो ठूलो कूटनीतिक सफलताको अवसर हात पार्न सफल रह्यो।
