काठमाडौं उपत्यकामा रात्रिकालीन बस सेवा सुरु

१ वैशाख, काठमाडौं । काठमाडौं महानगरपालिकाको संयोजनमा राजधानी उपत्यकामा आजदेखि रात्रिकालीन बस सेवा सुरु भएको छ। काठमाडौं महानगरले पहल गरेको यस सेवामा उपत्यकाका विभिन्न पालिका तथा साझा यातायातबीचको सहकार्यले यो सेवा सञ्चालनमा आएको हो। अबबाट राति ८ बजेदेखि ११ बजेसम्म पनि बस सेवा उपलब्ध गराइने छ।

साझा यातायातका बसहरूले ललितपुरको लगनखेल, पाटन अस्पताल, अल्का, नर्भिक, प्रसूति गृह, ट्रमा सेन्टर, वीर अस्पताल, कान्ति अस्पताल, टिचिङ्ग अस्पताल, गंगालाल हृदय केन्द्र हुँदै बुढानीलकण्ठसम्म एक रुटमा सेवा दिनेछन्। यो उत्तर–दक्षिण दिशा रहेको १६ किलोमिटरको एकतर्फी मार्ग हो। त्यसैगरी, थानकोटदेखि सतुंगल, कलंकी, कालीमाटी, त्रिपुरेश्वर, थापाथली, माइतीघर मण्डला, बानेश्वर, मीनभवन, तीनकुने हुँदै अन्तर्राष्ट्रिय विमानस्थलसम्म अर्को रुट सञ्चालन हुने छ।

पूर्व–पश्चिम दिशाको यो मार्गको दूरी एकतर्फी २० किलोमिटर छ। यी दुइटा रुटमा जम्मा ४ वटा रात्रिकालीन विद्युतीय बस संचालन गरिनेछ। तोकिएका बस स्टपहरूमा हरेक २० मिनेटमा बस उपलब्ध गराउने योजना रहेको जनाइएको छ। रात्रिकालीन बस सेवा शुभारम्भ कार्यक्रममा काठमाडौं महानगरपालिकाकी कार्यवाहक मेयर सुनीता डंगोलले पनि सहभागिता जनाएकी थिइन्।