२ वैशाख, काठमाडौं । बंगलादेशबाट मलेसिया जाँदै गरेको डुङ्गा हिन्द महासागरको पूर्वी किनारामा पर्ने अण्डमान सागरमा दुर्घटना हुँदा २५० जना बेपत्ता भएका छन्। संयुक्त राष्ट्रसंघको शरणार्थी तथा प्रवासन एजेन्सीका अनुसार अण्डमान सागरमा डुङ्गा दुर्घटनामा २५० रोहिङ्ग्या र बंगलादेशी नागरिक बेपत्ता भएका छन्। बीबीसीमा प्रकाशित समाचारअनुसार दुर्घटनामा परेको माछा मार्न प्रयोग हुने उक्त डुङ्गा बंगलादेशबाट मलेसियातर्फ जाँदै थियो। तीव्र हावा, खराब समुद्री अवस्था र डुङ्गामा क्षमता भन्दा बढी मानिस चढेपछि डुङ्गा समुद्रमा डुबेको समाचारमा उल्लेख छ।
बंगलादेश कोस्ट गार्डले समाचार एजेन्सी एएफपीलाई ९ अप्रिलमा उनीहरूको एक जहाजले डुङ्गा दुर्घटनामा परेका नौ जनालाई उद्दार गरेको जनाएको छ। उक्त डुङ्गा दुर्घटना कहिले भयो भन्ने स्पष्ट नभएको बीबीसीमा उल्लेख छ। रोहिङ्ग्या म्यानमारको एक अल्पसंख्यक समुदाय हो। सन् २०१७ मा भएको हिंस्रक अभियानपछि उनीहरू ठूलो संख्यामा बंगलादेश भागेका थिए। म्यानमार, जहाँ बहुसंख्यक बौद्ध धर्मावलम्बी छन्, रोहिङ्ग्या मुसलमानलाई नागरिकता दिँदैन। बंगलादेशको खराब अवस्थाका कारण धेरै रोहिङ्ग्या जोखिमपूर्ण समुद्री यात्रा गरेर मलेसिया पुगेका छन्। बंगलादेश कोस्ट गार्डले उद्दार गरेका मध्येका एक रफिकुल इस्लामले उद्दार हुनुअघि झण्डै ३६ घण्टासम्म समुद्रमा तैरिनु परेको बताए। मलेसियामा रोजगारी मिल्ने आशामा जोखिमपूर्ण यात्रा गरेको ४० वर्षीय इस्लामले भनेका छन्।
