अमेरिकी राष्ट्रपतिद्वारा डोनाल्ड ट्रम्पले इजरायल र लेबनानबीच १० दिने युद्धविरामको सहमति भएको घोषणा गर्नुभएको छ। ट्रम्पले ३४ वर्षपछि वाशिङटन डीसीमा दुई देशका अधिकारीहरूको पहिलो पटक भेटघाट भएको खुलासा गर्नुभएको छ। उहाँले उपराष्ट्रपति, विदेशमन्त्री र सेना प्रमुखसँग मिलेर दीर्घकालीन शान्ति स्थापना गर्ने निर्देशन दिनुभएको पनि बताउनुभयो।
३ वैशाख, काठमाडौं। बिहीवार साँझ सामाजिक सञ्जाल ट्रुथमार्फत अभिव्यक्ति दिँदै ट्रम्पले केही घण्टाभित्रै १० दिने युद्धविरामको सहमति भएकाे जानकारी दिनुभयो। ‘मैले भर्खरै लेबनानका माननीय राष्ट्रपति जोसेफ अवानेसँग र इजरायलका प्रधानमन्त्री बेन्जामिन नेतान्याहुसँग कुरा गरेँ,’ ट्रम्पले लेख्नुभएको छ, ‘यी दुई नेताहरूले आफ्ना देशहरूबीच शान्ति कायम गर्न १० दिनको युद्धविराम सुरु गर्ने सहमति गरेका छन्।’
ट्रम्पका अनुसार ती दुई देशका प्रतिनिधिहरूले ३४ वर्षपछि वाशिङटन डीसीमा पहिलो पटक भेटेर छलफल गरेका थिए, जसमा अमेरिकी विदेशमन्त्री मार्को रुबियो पनि सहभागी थिए। ‘मैले उपराष्ट्रपति जेडी भान्स, विदेशमन्त्री रुबियो, र संयुक्त सेना प्रमुख समितिका अध्यक्ष डान कैनीसँग मिलेर इजरायल र लेबनानबीच दीर्घकालीन शान्ति स्थापनाका लागि काम गर्न निर्देशन दिएको छु,’ उहाँले बताउनुभयो। ट्रम्पले विश्वभर ९ वटा युद्ध समाधान गर्नु आफ्नो सम्मानको विषय भएको र यो युद्ध समाधान भएपछि १० औं हुने पनि उल्लेख गर्नुभयो।
