एडोबीले गत अक्टोबरमा ‘प्रोजेक्ट मुनलाइट’ अन्तर्गत प्रदर्शन गरेको आफ्ना नयाँ एआई सहयोगीलाई आधिकारिक रूपमा ‘फायरफ्लाई एआई असिस्टेन्ट’को रूपमा सार्वजनिक गरेको छ। यो असिस्टेन्टले एडोबीका विभिन्न एपहरू जस्तै फोटोशप, एक्रोब्याट, र एक्सप्रेसलाई एकसाथ जोडेर प्रयोगकर्ताका जटिल कामहरू सजिलै सम्पन्न गराउनेछ। यो एआई असिस्टेन्ट केही हप्तामा सार्वजनिक बिटा परीक्षणका लागि उपलब्ध हुनेछ।
यसका मुख्य विशेषताहरू यस प्रकार छन्: क्रस-एप टास्क, जसले फायरफ्लाई, फोटोशप, प्रिमियर प्रो, लाइटरूम, इलस्ट्रेटर र एक्सप्रेस जस्ता धेरै एपहरूमा एकैसाथ काम गर्न सक्षम छ। प्रयोगकर्ताले मात्र आफूलाई आवश्यक कुरा वर्णन गर्नुपर्नेछ, बाँकी काम एआईले गर्नेछ। यसमा स्मार्ट कन्ट्रोल र सुझाव दिने सुविधा पनि समावेश गरिएको छ। उदाहरणका लागि, यदि तपाईं वनको पृष्ठभूमिमा फोटो सम्पादन गर्दै हुनुहुन्छ भने, एआईले स्लाइडरमार्फत रूख वा पातहरूको संख्या घटाउन वा बढाउन विकल्प दिनेछ।
एडोबीका अनुसार, यो असिस्टेन्ट लगातार समयसँगै प्रयोगकर्ताको सिर्जनात्मक शैली र प्राथमिकताहरूको अध्ययन गर्दै तदनुरूप कामका सुझाव प्रदान गर्नेछ। मल्टि-स्टेप ‘स्किल्स’ले सामाजिक सञ्जालको सामग्री तयार गर्ने जस्ता बहु चरणीय कार्यहरूलाई स्वचालित बनाउनेछ। यसले स्वतः फोटो क्रप गर्ने, फाइल आकार मिलाउने र विभिन्न प्लेटफर्महरूका लागि फाइल सेभ गर्ने कामहरू सम्हाल्नेछ। भिडियो सम्पादनमा सुधारको लागि, फायरफ्लाईको भिडियो सम्पादक सुविधामा आवाजबाट अनावश्यक ‘नोइज’ हटाउने, संगीत र रङ्ग समायोजन गर्ने तथा एडोबी स्टक लाइब्रेरीसँग सिधै जोडिन सक्ने नयाँ सुविधाहरू पनि थपिएका छन्।
एडोबीमा एआई तथा नवप्रवर्तनका उपाध्यक्ष अलेक्जान्ड्रु कोस्टिनले यस प्रविधि सम्बन्धमा कुरा गर्दै भने, “फायरफ्लाई एआई असिस्टेन्टमार्फत हामीले हाम्रा धेरै एपहरू चलाउन सिक्नुपर्ने झन्झट हटाउने र ग्राहकहरूलाई सजिलै सबै सेवा प्रदान गर्ने अवसर पाएका छौं।” यसका अतिरिक्त, एडोबीले क्लिंग ३.० जस्ता थर्ड-पार्टी एआई मोडेलहरूलाई पनि आफ्नो लाइब्रेरीमा समावेश गर्दैछ, जसले प्रयोगकर्ताहरूलाई थप विकल्पहरू उपलब्ध गराउनेछ।
