समाचार सारांश: बैतडीमा दुई मोटरसाइकल ठोक्किँदा जनक लुहारको उपचारको क्रममा मृत्यु भएको छ। दुर्घटनामा पाँच जना घाइते भएका छन्, जसमा दुई जनालाई डडेल्धुरा अस्पतालमा रेफर गरिएको छ। दुर्घटना सुर्नया गाउँपालिका–८ ढोल्यमोडमा शुक्रबार दिउँसो साढे १ बजे भएको हो।
बैतडीमा दुई वटा मोटरसाइकल ठोक्किँदा एक जनाको ज्यान गएको छ। पुर्चौडीबाट ढोल्यमोडतर्फ आउँदै गरेको से ५ प ४७१७ नम्बरको मोटरसाइकलका चालक सुर्नया गाउँपालिका–८ का ३४ वर्षीय जनक लुहारको उपचारको क्रममा मृत्यु भएको जिल्ला प्रहरी कार्यालय बैतडीका सूचना अधिकारी प्रहरी निरीक्षक सुरज सिंहले जानकारी दिए। गम्भीर घाइते भएका लुहारलाई उपचारको लागि नजिकैको देउलेक अस्पतालमा लगिएकोमा पौने ४ बजे चिकित्सकहरूले उनको मृत्यु घोषणा गरेका छन्।
शुक्रबार दिउँसो साढे १ बजे जिल्लाको श्रीभावरदेखि पुर्चौडी तर्फ जाँदै गरेको पुर्चौडी नगरपालिका–५ का २४ वर्षीय अमिर कठायतले चलाएको सुदूरपश्चिम प्रदेश ०१ ०१३ प ४२४६ नम्बरको मोटरसाइकल र पुर्चौडीबाट ढोल्यमोडतर्फ आउँदै गरेको सुर्नया गाउँपालिका–८ का ३४ वर्षीय जनक लुहारले चलाएको से ५ प ४७१७ नम्बरको मोटरसाइकल सुर्नया गाउँपालिका–८ ढोल्यमोडमा ठोक्किएर दुर्घटना भएको हो।
दुर्घटनामा परी दुवै मोटरसाइकलका चालकसहित पाँच जना घाइते भएका थिए। गम्भीर घाइते जनक लुहारको मृत्यु भएको छ। घाइतेमध्ये पुर्चौडीबाट ढोल्यमोड तर्फ आउँदै गरेको मोटरसाइकलको पछाडि सवार पुर्चौडी नगरपालिका–५ का हिक्मत कुँवर, श्रीभावरदेखि पुर्चौडी तर्फ जाँदै गरेको मोटरसाइकलमा सवार सिगास गाउँपालिका–९ का ३४ वर्षीय जय बहादुर चन्द र सोही मोटरसाइकलमा सवार सिगास गाउँपालिका–९ का २६ वर्षीय केशव बहादुर चन्द रहेका छन्। जिल्ला प्रहरी कार्यालय बैतडीका प्रवक्ता प्रहरी निरीक्षक सुरज सिंहले जानकारी दिए। गम्भीर घाइते मोटरसाइकल चालक जनक लुहारलाई प्राथमिक स्वास्थ्य केन्द्र देउलेकमा पठाइएको छ। अर्का मोटरसाइकल चालक अमिर कठायत र पछाडि सवार हिक्मत कुँवरलाई डडेल्धुरा अस्पतालमा रेफर गरिएको छ। अन्य घाइतेको स्थानीय स्वास्थ्य संस्थामा उपचार भइरहेको छ।
