४ वैशाख, विराटनगर। आर्थिक अभावका कारण विराट निदान अस्पताल एन्ड ट्रमा सेन्टरमा रोकिएका सिन्धुलीका १९ वर्षीय शिव सदा डिस्चार्ज भएका छन्। आर्थिक अवस्थाबारे समाचार प्रकाशन भएपछि सिजी ग्रुपको सिजी होल्डिङ्सका अध्यक्ष अरुणकुमार चौधरीले उपचार खर्च तिरेपछि उनी अस्पतालबाट छुट्टी भएका हुन्। समाचार प्रकाशित भएपछि चौधरीले शिवको उपचार खर्चका लागि १ लाख रुपैयाँ फेटाएका छन्।
सिन्धुलीको दुधौली नगरपालिका-७ पोखरेका शिव सदाले गत २७ चैतमा विष सेवन गरेका थिए। उनलाई आमा मघिया सदा र श्रीमती कृतिकाले उपचारका लागि पहिला कटारी र त्यसपछि विराटनगरको कोशी अस्पताल लगिएका थिए। कोशी अस्पतालमा उपचार सम्भव नभएपछि उनलाई २८ चैतमा विराटनगरकै विराट निदान अस्पतालमा भर्ना गरिएको थियो। गम्भीर अवस्थामा रहेका शिवलाई आईसीयूमा राखेर उपचार गरिएको थियो। उपचार अवधिमा अस्पतालको बिल ६२ हजार ६०० र औषधिको ७६ हजार ५८६ गरी कुल १ लाख ३९ हजार १८६ रुपैयाँ पुगेको थियो।
तर विपन्न परिवारका सदाले ऋण गरेर जम्मा १५ हजार रुपैयाँ मात्र बुझाउन सके। बाँकी १ लाख २४ हजार १८६ रुपैयाँ तिर्न नसकेपछि शिवकी आमा मघिया सदा बाटो खर्चको अभावमा विराटनगरबाट पैसा खोज्न पैदल सिन्धुलीतर्फ लागेकी थिइन्। अस्पतालमा शिव र उनकी १४ वर्षीया श्रीमती कृतिकाले मात्रै अलपत्र अवस्थामा बसेका थिए। मातातिर्थ औंशीको दिन एक आमा छोराले उपचार खर्चका लागि मोबाइलसमेत बन्धकी राखेर हिँडेको र छोरा अलपत्र रहेको खबर सार्वजनिक भएपछि अरुणकुमार चौधरीले तत्काल सहयोग गर्ने इच्छा व्यक्त गरेका थिए।
समन्वयमा शुक्रबार नै चौधरीले अस्पतालको बिल वापत १ लाख रुपैयाँ तिरेका थिए। चौधरीको सहयोगपछि अस्पतालले पनि २४ हजार १८६ रुपैयाँ छुट दिएको थियो। अस्पतालका सञ्चालक अजय यादवले सदाको आर्थिक अवस्था कमजोर भएकाले आफूहरूले पनि सहयोग गरेको बताए। ‘उनीहरूको आर्थिक अवस्था कमजोर छ, अरुण चौधरीले रकम दिएपछि हामीले पनि छुट दिएका छौं,’ उनले भने।
यादवका अनुसार गम्भीर अवस्थामा आएका सदालाई आईसीयूमा राखेर उपचार गरिएको थियो। ‘उपचार सुरु हुँदा बिरामीलाई उपचार प्रक्रिया र शुल्कबारे जानकारी गराइन्छ, उहाँलाई पनि थाहा थियो,’ यादवले भने, ‘डिस्चार्जको बखत खर्च तिर्न भनेका थियौं। घर फर्कँदा उपचार खर्च ल्याउने भन्दै जानुभएको थियो, तर फर्कनुभएन।’ अस्पतालबाट डिस्चार्ज हुँदा घर जानको लागि ट्याक्सी भाडा समेत नपाएका शिवलाई अस्पताल सञ्चालक यादवले २ हजार रुपैयाँ बाटो खर्च दिएको बताए। डिस्चार्ज हुँदै गर्दा शिव र कृतिकाले अरुण चौधरीलाई सहयोगका लागि धन्यवाद व्यक्त गरे। ‘गर्न नहुने गल्ती गरेँ, अब सुधार गर्छु,’ अस्पतालबाट खुशी मुद्रामा निस्कँदै गरेका सदाले भने, ‘अब यस्तो गल्ती गर्दिनँ, मिहिनेत गर्छु, काम गर्छु।’
