समाचार संक्षेप सम्पादकीय रूपमा समीक्षा सहित तयार गरिएको छ। नेपाली कांग्रेसका महामन्त्री गुरुराज घिमिरेले सर्वोच्च अदालतको निर्णयले कुनै हार वा जित नभएको बताएका छन्। सर्वोच्च अदालतले गगन थापा नेतृत्वको विशेष महाधिवेशनबाट निर्वाचित कांग्रेसलाई आधिकारिकता प्रदान गरेको छ। घिमिरेले सबै कांग्रेस नेता तथा कार्यकर्तालाई १५औं महाधिवेशनमा केन्द्रित भई एकताबद्ध हुनुपर्ने बताएका छन्। ४ वैशाख, काठमाडौं। नेपाली कांग्रेसका महामन्त्री गुरुराज घिमिरेले सर्वोच्च अदालतको निर्णय कसैको हार वा जित नभएको बताएका छन्। शुक्रबार न्यायाधीशश्री शारंग सुवेदी र नृपध्वज निरौलाको संयुक्त इजलासले गगन थापा नेतृत्वको विशेष महाधिवेशनबाट निर्वाचित कांग्रेसलाई आधिकारिकता दिएको निर्णयपछि उनले यस्ता कुरा बताएका हुन्। घिमिरे स्वयं थापा नेतृत्वमा विशेष महाधिवेशनबाट निर्वाचित महामन्त्री हुन्। उनले सर्वोच्चको निर्णयलाई विधि र प्रक्रियाका लागि अनवरत गरिएको सङ्घर्षको सफल फल उल्लेख गरेका छन्। ‘सर्वोच्च अदालतले नेपाली कांग्रेसको आधिकारिकतासम्बन्धी दायर रिट निवेदनमा गरेको आदेश न्यायपूर्ण छ। यो नेपाली कांग्रेसका सदस्यहरूले देशमा विधि र प्रक्रियाका लागि निरन्तर संघर्ष गरेको सकारात्मक परिणाम हो,’ उनले भने, ‘यस निर्णयले सबैको आत्मसम्मान र योगदानको कदर गरेको छ। यो कसैको हार वा जित होइन।’ उनले अब कांग्रेसका सबै नेता तथा कार्यकर्ताले एकताबद्ध भएर १५औं महाधिवेशनमा केन्द्रित हुनुपर्ने बताए। ‘अब हामी नेपाली कांग्रेसका सबै साथीसँग एकताबद्ध भई पार्टीको १५औं महाधिवेशनलाई उत्साह र एकताका साथ सम्पन्न गराउन केन्द्रित हुनुपर्छ,’ उनले भने, ‘विगतका सबै विवादलाई भुलेर नेपाली कांग्रेसको आन्तरिक एकतालाई सुदृढ बनाएर अघि बढ्नुपर्छ।’
