नेप्सेले सोमबारदेखि नयाँ सर्किट ब्रेक व्यवस्था लागू गर्दैछ। यसअनुसार, कारोबार सुरु भएको दुई घण्टाभित्र परिसूचक ५ प्रतिशतले बढे वा घटेमा पहिलो ब्रेक लाग्नेछ। पहिलो सर्किट ब्रेक लागेपछि १५ मिनेटका लागि कारोबार स्थगित हुनेछ र त्यसपछि परिसूचक ८ प्रतिशतले बढे वा घटेमा दोस्रो ब्रेक लागेर सो दिनका लागि कारोबार रोकिनेछ। यसअघि तीन सर्किट ब्रेकको व्यवस्था थियो, तर अब दोहोरो सर्किट ब्रेक रहनेछ र सर्किट ब्रेकरको सीमा बढाइएको छ। ४ वैशाख, काठमाडौं।
सोमबारदेखि सेयर बजारमा नयाँ सर्किट ब्रेक व्यवस्था लागू हुने भएको छ। नेप्सेले हालको कारोबार सञ्चालक विनियमावली संशोधन गरी आगामी सोमबारदेखि नयाँ नियम लागू गर्ने निर्णय गरेको छ। नयाँ व्यवस्थाअनुसार, कारोबार सुरु भएको दुई घण्टाभित्र नेप्से परिसूचकले अघिल्लो दिनको तुलनामा ५ प्रतिशतले बढ्ने वा घट्ने बित्तिकै पहिलो सर्किट ब्रेक लाग्नेछ। त्यसपछि १५ मिनेटका लागि कारोबार रोकिनेछ। १५ मिनेटपछि खुल्ने कारोबारमा नेप्से परिसूचक ८ प्रतिशतले बढे वा घटेमा त्यसै दिनका लागि कारोबार स्थगित हुनेछ। अब बजारमा दुई सर्किट ब्रेकमात्र लाग्नेछन् तर सर्किट ब्रेकरको सीमा बढाइएको छ। अघिल्लो नियमअनुसार तीन सर्किट ब्रेकको व्यवस्था थियो। पहिलो एक घण्टाभित्र परिसूचक ४ प्रतिशतले बढे वा घटेमा पहिलो सर्किट ब्रेक लागेर २० मिनेट कारोबार स्थगित गर्ने व्यवस्था थियो। त्यसपछि खोलिएको कारोबारमा ५ प्रतिशतले बढे वा घटेमा दोस्रो सर्किट ब्रेक लागेर ४० मिनेट कारोबार स्थगित गर्ने व्यवस्था थियो। अनि ४० मिनेटपछि खुल्दा अघिल्लो दिनको तुलना गरी समग्र नेप्से परिसूचक ६ प्रतिशतले बढे वा घटेमा तेस्रो सर्किट ब्रेक लागू हुन्थ्यो।
