५ वैशाख, ताप्लेजुङ । ताप्लेजुङमा अवस्थित विश्वको तेस्रो उच्च हिमाल कञ्चनजंघा क्षेत्रमा पर्यटकहरूको आगमन सुरु भएको छ । मौसम अनुकूल हुँदै जाँदा आन्तरिक तथा विदेशी पर्यटकहरूको चहलपहल बढ्न थालेको छ । कञ्चनजंघा क्षेत्र चैतको पहिलो सातादेखि जेठको तेस्रो सातासम्म भ्रमणका लागि सर्वश्रेष्ठ समय मानिन्छ । कञ्चनजंघा संरक्षण क्षेत्र व्यवस्थापन परिषद्, घुन्सा चेकपोस्टका पर्यटन सहायक टाँसीछिरिङ शेर्पाका अनुसार, पछिल्लो एक महिनामा १६५ जना विदेशी पर्यटकले भ्रमण गरेका छन् । यस क्षेत्रमा वर्षमा दुई पटक प्रमुख पर्यटकीय याम मानिन्छ । पहिलो याम चैतदेखि जेठसम्म र दोस्रो असोजदेखि मङ्सिरसम्म रहेको छ, उनले जानकारी दिए । गत वर्षको पहिलो याममा मात्रै ७५० विदेशी पर्यटक यहाँ आएका थिए, घुन्सा चेकपोस्टले जनाएको छ ।
कञ्चनजंघा आधार शिविरमा पुग्न दुई प्रमुख पदमार्गहरू चलाइएका छन् । एउटा पाँचथरको गणेशचोक हुँदै सिरिजंघा गाउँपालिका हुँदै र अर्को काठमाडौंबाट हवाई मार्ग हुँदै सुकेटार विमानस्थल पुगेर फक्ताङलुङ गाउँपालिकाबाट जाने बाटो हो । पर्यटकहरूको लागि लक्षित गर्दै कञ्चनजंघा पदमार्गमा सानाठूला गरी ५२ वटा होटलहरू सञ्चालनमा छन्, कञ्चनजंघा संरक्षण क्षेत्र व्यवस्थापन परिषद्ले जनाएको छ । फक्ताङलुङ गाउँपालिका–६ ग्याप्लामा करिब सात करोड रुपैयाँभन्दा बढी लगानीमा ‘सिङ्गी नामजोंग होटल’ सञ्चालनमा आएको छ । समुद्री सतहबाट तीन हजार ५०० देखि चार हजार ५०० मिटर उचाइसम्म एक करोड रुपैयाँभन्दा बढी लगानीमा बनेका चार होटलहरू सञ्चालनमा रहँदै छन्, घुन्सा चेकपोस्टका पर्यटन सहायक शेर्पाले जानकारी दिए ।
सदरमुकाम फुङ्लिङ बजारमा पनि पर्यटक लक्षित गरेर ठूला लगानीका होटलहरू सञ्चालनमा आएका छन् । पर्यटकहरूको आगमन बढेसँगै यहाँका पर्यटन तथा होटल व्यवसायीहरू उत्साहित बनेका छन् । कञ्चनजंघा संरक्षण क्षेत्रका स्थानीय समुदायको मुख्य जीविकोपार्जन पर्यटन, होटल व्यवसाय र पशुपालनमा आधारित छ । घुन्सा, फले र याम्फुदिन क्षेत्रका अधिकांश परिवारहरू पर्यटनसँग प्रत्यक्ष रूपमा जोडिएका छन्, पर्यटन सहायक शेर्पाले बताए । उनका अनुसार केहीले होटल सञ्चालन गरेर स्वरोजगार बनेका छन् भने केही पर्यटक मार्गदर्शक वा सहयोगीका रूपमा आम्दानी गर्दै आएका छन् । खेतीपातीका सम्भावना कम भएकाले पछिल्लो समय युवापुस्ता पशुपालनभन्दा पर्यटन व्यवसायतर्फ आकर्षित देखिएका छन्, उनले बताए ।
सन् १९५५ मे २५ मा कञ्चनजँगाको पहिलो आरोहण भएको इतिहास छ । विगतमा फुङ्लिङबाट पैदल यात्रा गर्दा करिब २४ दिन लाग्ने यो क्षेत्रको भ्रमणको अवधिभन्दा अहिले छोटिएको छ, हाल ११ देखि १६ दिनभित्र दुवै आधार शिविर पुगेर फर्कन सकिन्छ । यहाँ चैत, वैशाख, जेठ तथा असोज, कात्तिक र मङ्सिरमा पर्यटकहरूको चाप बढी हुने गर्दछ । हिमाल आरोहण मुख्यत: वैशाख र जेठमा हुने गरेको छ, पर्यटन सहायक शेर्पाले जानकारी दिए । यहाँ जापान, जर्मनी, अष्ट्रेलिया, अमेरिका, फ्रान्स, बेलायत, नेदरल्यान्ड, क्यानडा, स्विजरल्यान्ड, बेल्जियम, फिलिपिन्स, स्पेन, स्विडेन लगायत देशहरूबाट पर्यटक आउने गरेका छन् । साथै भारत र चीनबाट पनि कम संख्यामा पर्यटक भ्रमण तथा आरोहणका लागि आउने गरेका छन् ।
