सवारी निषेध गर्दै जीवन्त र समृद्ध असन कार्यक्रमको शुरुवात

काठमाडौं महानगरपालिकाले असन क्षेत्रमा प्रत्येक शनिबार सामाजिक, सांस्कृतिक र परम्परागत व्यापार प्रवर्द्धन कार्यक्रम सञ्चालन गरेको छ। कमलाछी चोकदेखि असनसम्मको क्षेत्रमा शनिबार सवारीसाधनको प्रवेश पूर्णरूपमा रोकिएको छ। यस कार्यक्रमले असनको मौलिकता जोगाउँदै परम्परागत जीवनशैली, जात्रा, पर्व, संस्कार र पुर्खाको ज्ञान निरन्तरता दिने उद्देश्य राखेको छ।

५ वैशाख, काठमाडौं। काठमाडौंको प्राचीन असन क्षेत्रमा शनिबारदेखि सामाजिक, सांस्कृतिक तथा परम्परागत व्यापार प्रवर्द्धन कार्यक्रम सुरु गरिएको छ। असन क्षेत्रको मौलिकतालाई संरक्षण गर्न काठमाडौं महानगरपालिकाले आजबाट प्रत्येक शनिबार “जीवन्त र समृद्ध असन” कार्यक्रम सुरु गरेको छ। यस कार्यक्रमको उद्देश्य काठमाडौंको सांस्कृतिक पहिचान, परम्परागत जीवनशैली, जात्रा, पर्व, संस्कार, संस्कृतिको पुस्तान्तरण र पुर्खाको ज्ञान र सीपलाई निरन्तरता दिनु हो।

कमलाछी चोक, भोटाहिटी चोक र महाबौद्धबाट असनसम्मको क्षेत्रमा सामाजिक, सांस्कृतिक तथा परम्परागत व्यापार प्रवर्द्धन कार्यक्रम आयोजना भएपछि सो क्षेत्रमा प्रत्येक शनिबार सवारीसाधनको प्रवेशमा पूर्ण रोक लगाइएको छ। कार्यक्रम अवधिमा जमलतर्फ कमलाछी सिंहढोकाबाट असनतर्फ सवारी प्रवेश निषेध रहनेछ।

असनमा मौलिक सांस्कृतिक कार्यक्रम तथा सामाजिक क्रियाकलाप व्यवस्थापनको जिम्मेवारी महानगर प्रहरी बललाई दिइएको छ। यस कार्यक्रमले सांस्कृतिक पहिचान र परम्परागत जीवनशैली, जात्रा, पर्व तथा संस्कारको पुस्तान्तरणलाई निरन्तरता दिने अपेक्षा गरिएको छ।