धितोपत्र बोर्डको प्रतिवेदन अनुसार, दीपक भट्टले विभिन्न डिबेन्चरहरू सस्तोमा किनेर मूल्य वृद्धि गरी सार्वजनिक कम्पनीहरूलाई बिक्री गरेको देखिएको छ। भट्टले १ लाख कित्ता नबिल डिबेन्चर–८५ १० करोड ८० लाखमा किनेर आफ्ना निकटका कम्पनीलाई ११ करोड ८१ लाख २१ हजारमा बिक्री गरेका छन्। अनुसन्धानमा सहकार्य गर्ने अन्य व्यक्तिहरूमा सन्दीदप चाचान, शुभी अग्रवाल, ऋषिराज मोर र राजबहादुर शाह रहेका छन्। (८ वैशाख, काठमाडौं)
विवादास्पद व्यवसायी दीपक भट्टले विभिन्न डिबेन्चरहरू सस्तो मूल्यमा आफ्नै नाममा किनेपछि मूल्य वृद्धि गरी सार्वजनिक कम्पनीहरूलाई बिक्री गर्ने गरेको धितोपत्र बोर्डको अनुसन्धान प्रतिवेदनले देखाएको छ। धितोपत्र बोर्डको सुपरिवेक्षण विभागले तयार पारेको उक्त प्रतिवेदन अनुसार, भट्टले नेपाल रिइन्स्योरेन्सको सेयर मात्र नभई नबिल बैंकको डिबेन्चर एनबीएलडी–८५, नेपाल इन्भेस्टमेन्ट मेगा बैंकको डिबेन्चर एनआईएमबीडी ९०, एसबीआई बैंकको डिबेन्चर एसबीआईडी ८३ तथा सिद्धार्थ बैंकको डिबेन्चर एसबीएलडी ८९ आफ्नो नाममा किनेका थिए।
प्रतिवेदनमा उल्लेख भए अनुसार, भट्टले एनबीएलडी–८५ ऋणपत्र हिमालयन रिइन्स्योरेन्सबाट ९ नोभेम्बर २०२५ मा प्रति कित्ता मूल्य १ हजार ८० मा किनेका थिए। हिमालयन रिइन्स्योरेन्समा भट्टको एकल स्वामित्व रहेको इन्फिनिटी होल्डिङ्स प्रालिको ४.५ प्रतिशत स्वामित्व छ। उक्त सेयर नोभेम्बर १६ मा गार्डियन माइक्रोलाइफ इन्स्योरेन्स कम्पनीलाई प्रति कित्ता मूल्य १ हजार १ सयदेखि १ हजार १ सय ६० सम्म बिक्री गरिएको छ, प्रतिवेदनमा उल्लेख छ।
त्यसै कम्पनीमा भट्टको १५ प्रतिशत स्वामित्व रहेको पनि प्रतिवेदनमा जनाइएको छ। त्यही डिबेन्चर क्रेस्ट माइक्रोलाइफ इन्स्योरेन्सलाई प्रति कित्ता १ हजार १ सय ६० देखि १ हजार १ सय ८२ सम्म र प्रोटेक्टिभ माइक्रोइन्स्योरेन्सलाई प्रति कित्ता १ हजार १ सय ८५ मा बिक्री गरिएको छ। ती दुई माइक्रोइन्स्योरेन्स कम्पनीहरूमा हिमालयन रिइन्स्योरेन्सको क्रमशः १५ प्रतिशत र २१.४३ प्रतिशत स्वामित्व रहेको धितोपत्र बोर्डको प्रतिवेदनमा उल्लेख छ।
