विश्वकै सबैभन्दा ठूलो कन्डम उत्पादक कम्पनी कारेक्सले इरानी युद्धका कारण कच्चा पदार्थ अभाव हुँदा उत्पादन मूल्य ३० प्रतिशत वा त्यसभन्दा बढीले वृद्धि गर्ने तयारी गरेको छ। कारेक्सका प्रमुख कार्यकारी अधिकृत गो मिया कियाटले युद्ध सुरु भएदेखि उत्पादन लागतमा उल्लेख्य वृद्धि भएको र ढुवानी खर्च तथा ढिलाइले बजारमा अभाव बढाएको बताए।
इरानसँगको युद्धले ऊर्जा बजार र दैनिक उपभोग्य वस्तुहरूको मूल्यमा दबाब सिर्जना गरेको र आर्थिक अनिश्चयताको समयमा कन्डमको माग करिब ३० प्रतिशतले बढेको कम्पनीले जनाएको छ। मलेसियामा आधारित यस कम्पनीका प्रमुख कार्यकारी अधिकृत गो मिया कियाटले रोयटर्स र ब्लुमबर्गसँगको अन्तर्वार्तामा युद्ध सुरु भएदेखि उत्पादन लागतमा उल्लेख्य वृद्धि भएको बताए।
‘ड्युरेक्स’ र ‘ट्रोजन’ जस्ता विश्वप्रसिद्ध ब्राण्डका लागि उत्पादन गर्ने कारेक्सले वार्षिक ५ अर्बभन्दा बढी कन्डम उत्पादन गर्दै आएको छ। अमेरिकी र इजरायली हवाई आक्रमणपछि इरानले होर्मुज स्ट्रेटबाट हुने ढुवानीमा अवरोध लगाउने धम्की दिएपछि विश्वव्यापी तेल आपूर्तिमा नकारात्मक प्रभाव परेको छ।
कारेक्सले कन्डम उत्पादनका लागि आवश्यक एमोनिया र सिलिकनमा आधारित लुब्रिकेन्टहरू तेलमा आधारित सामग्रीमा निर्भर रहने भएकाले युद्धको प्रभाव मूल्यमा परेकाे कम्पनीले जनाएको छ। विशेषगरी आर्थिक संकट वा अनिश्चितताका समयमा कन्डमको माग करिब ३० प्रतिशतले बढेको बताए। सीईओ कियाटका अनुसार मानिसहरू आफ्नो भविष्य र जागिरप्रति अनिश्चित हुँदा थप आर्थिक भार बढ्ने डरले परिवार नियोजनका साधन प्रयोग गर्ने गर्छन्।
