मध्यपूर्व तनावः इजरायल-लेबनन युद्धविराम थप तीन हप्तासम्म लम्ब्याइयो, ट्रम्पको घोषणा
अमेरिकी राष्ट्रपति डोनाल्ड ट्रम्पले लेबननमा थप तीन हप्ताका लागि युद्धविराम कायम राखिने बताएका छन्। इजरायलले इरानको समर्थन प्राप्त हिज्बुल्लाह समूहविरुद्ध सैन्य कारबाही गर्दै आएको लेबननमा पहिलो चरणको युद्धविरामको अवधि आइतबार सकिँदै थियो। वाशिंगटनमा भएको दोस्रो चरणको वार्ताको क्रममा इजरायली र लेबनी अधिकारीहरूसँगको बैठकमा राष्ट्रपति ट्रम्पले युद्धविराम समयावधि थप गर्ने घोषणा गरेका छन्।
इजरायली सेनाले दक्षिण लेबननका क्षेत्रहरूमा नियन्त्रण कायम गरेको दाबी गर्दा, हिज्बुल्लाहले उक्त बैठकप्रति असहमति जनाएको थियो। वार्ता सुरु हुनु केही अघि हिज्बुल्लाहले उत्तरी इजरायलमा रकेट आक्रमण गरेको जानकारी दिएको थियो। ओभल अफिसमा प्रेसमाझ राष्ट्रपति ट्रम्पले उपराष्ट्रपति जेडी भान्स र विदेशमन्त्री मार्को रुबियो पनि सहभागी रहेको बैठक “राम्रोसँग अघि बढेको” बताएका छन्।
राष्ट्रपति ट्रम्पले भने, “संयुक्त राज्य अमेरिकाले हिज्बुल्लाहबाट लेबननलाई बचाउनका लागि उक्त देशसँग मिलेर काम गर्नेछ।” हिज्बुल्लाहलाई इजरायल र लेबनन दुवैका लागि “साझा समस्या” को रूपमा चिनाउँदै ट्रम्पले ती देशहरूसँग समन्वय गरी समाधान निकाल्ने प्रतिबद्धता जनाए।
यसैबीच, राष्ट्रसंघका लागि इजरायली राजदूतले थप गरिएको युद्धविरामले इजरायल र लेबननमा आधारित इरानबाट समर्थन पाएको हिज्बुल्लाहबीचको द्वन्द्व पूर्ण रूपमा रोक्न कठिन हुने बताएका छन्।
सीएनएनसँग कुरा गर्दै ड्यानी ड्याननले भने, “हिज्बुल्लाहमाथि लेबनन सरकारको कुनै नियन्त्रण छैन।” वार्ता भइरहेका बेला इजरायली सेनाले आफ्नो क्षेत्रभित्र लेबननबाट आएको रकेट हमला भएको सूचना दिएको थियो। आक्रमण भएको भनिएको क्षेत्रमा साइरन पनि बजेको थियो। तर पछि इजरायली सेनाले रकेट हमला गर्न प्रयोग गरिएको स्थानमाथि आक्रमण गरेको पुष्टि गरेको छ।
