धनकुटाको नमस्ते झरनालाई गत वर्ष आएको बाढीले भत्काएको पूर्वाधारका कारण पर्यटकहरूको आगमन घटेको छ। स्थानीय सरकार र कोशी प्रदेश सरकारले यस झरनाको पुनर्निर्माणका लागि क्रमशः १० लाख र १५ लाख रुपैयाँ विनियोजन गरिसकेका छन्। साँगुरीगढी गाउँपालिकाले अस्थायी पुल र भर्याङ बनाएर पहुँच सहज बनाएको छ भने स्थायी ट्रस पुल निर्माण आवश्यक रहेको छ। १६ वैशाख, धनकुटा।
पूर्वी पहाडको धनकुटा जिल्लामा अवस्थित नमस्ते झरना कुनै समयमा आन्तरिक तथा भारतीय पर्यटकहरूको प्राथमिक रोजाइमा पर्ने एक प्रमुख पर्यटकीय गन्तव्य थियो। गर्मी मौसमको सुरुवातसँगै यहाँ आन्तरिक र भारतीय पर्यटकहरूको घुइँचो लाग्थ्यो। चिसो पानीमा पौडी खेल्ने, झरनाको काखमा बनेको प्राकृतिक पोखरीमा रमाउने र परिवार तथा साथीभाइसँग रमाइलो गर्नेहरूको भिडले यो क्षेत्र सधैं जीवन्त देखिन्थ्यो। तर, अहिले यो झरना प्राकृतिक सौन्दर्यका बाबजुद पनि सुनसान देखिन थालेको छ।
झरना सुनसान बन्नुको मुख्य कारण गत वर्षको बाढीले भत्काएको पूर्वाधार र त्यसले उपजाएको असुरक्षा हो। प्राकृतिक सुन्दरता यथावत् रहे पनि यहाँ पुग्ने बाटो जोखिमपूर्ण बन्दै गएपछि पर्यटकहरूको आगमन घट्न थालेको हो। स्थानीय तह र समुदायले अस्थायी रूपले बाँस र काठ प्रयोग गरी संरचना निर्माण गरेका भए पनि ती दिगो समाधान बन्न सकेका छैनन्। नमस्ते झरना व्यवस्थापन समितिका सचिव जीवन सुब्बाले झरनाकै पर्यटकको चहलपहल कम भएको बताए।
‘पहिले जस्तो पर्यटकको चहलपहल छैन। अझै पनि मानिसहरू डराईरहेका छन्,’ उनले भने, ‘माथिबाट बाढी आएर झरनामा पुग्नु नै सम्भव छैन। झरना हेर्न आउनेहरू झरनासम्म जान पाउँदैनन् भने किन आउने?’ झरना र वरिपरिका पर्यटक गन्तव्यका लागि आउने पर्यटकहरूको लागि यस्तो अवस्था असहज रहेको लिम्बुले बताए। तथापि, स्थानीय सरकार र प्रदेश सरकारले झरनाको पुनर्जीवनका लागि पहल थालिसकेका छन्। झरना व्यवस्थापनका लागि साँगुरीगढी गाउँपालिकाले १० लाख र कोशी प्रदेश सरकारले १५ लाख रुपैयाँ विनियोजन गरिसकेको छ।
