नेपाल पुलिस क्लबले नेपाल एपीएफ क्लबलाई ३-१ ले पराजित गर्दै रेडबुल दशैं पीएम कप एनभीए महिला भलिबल लिग २०८३ को फाइनलमा प्रवेश गरेको छ। पुलिस क्लबले चार खेलबाट १२ अंक जोडेको छ भने न्यु डायमण्डले पनि चार खेल जितेर फाइनल पुगिसकेको छ।
१६ वैशाख, काठमाडौं। बुधबार दशरथ रंगशाला कभर्डहलमा सम्पन्न विभागीय डर्बी खेलमा नेपाल एपीएफ क्लब विरुद्ध ३-१ को पुनरागमन जित निकाल्दै पुलिसले फाइनल यात्रा तय गरेको हो। पुलिसले एपीएफलाई २१-२५, २५-१९, २९-२७, २५-२१ को स्कोरमा पराजित गरेको छ।
पुलिसले चार खेलबाट १२ अंक जोडेको छ भने, पहिले नै न्यु डायमण्डले समेत चार खेल जितेर फाइनल पुगेको छ। यी दुई टिमबीच बिहीबार लिग चरणको अन्तिम खेल हुनेछ र उपाधिका लागि यही दुई टिमहरू शनिबार भिड्नेछन्। महिला तर्फ अर्को खेलमा त्रिभुवन आर्मी क्लबलाई ३-१ ले हराउँदै एभरेस्ट भलिबल क्लबले तेस्रो जित हात पार्दै तेस्रो स्थान कब्जा गरेको छ।
