नेपाली कम्युनिस्ट पार्टीका संयोजक पुष्पकमल दाहाल प्रचण्डले फागुन २१ गतेको निर्वाचनलाई असामान्य र अस्वाभाविक भनेका छन्। प्रचण्डले निर्वाचन परिणाममा मत गुम्ने र मत बढी आउने ठाउँका रिपोर्टहरूलाई अध्ययन गरी गहिरो अनुसन्धान गर्नुपर्ने बताए। उनले कम्युनिस्ट आन्दोलनको पुनर्गठन आवश्यक रहेको र पार्टीको विस्तारित बैठकले पहल सुरु गरेको बताए।
रुकुमपश्चिममा पत्रकारसँग कुरा गर्दै प्रचण्डले भने, “परिणाम जस्तो आएको छ, त्यो पनि कयौं ठाउँका रिपोर्टहरू सुन्दा सहज किसिमले आएको देखिँदैन। कतिपय ठाउँमा स्वयं उम्मेदवारले आफूले हालेको भोट पनि आफूलाई नपरेको, कतिपय ठाउँमा जित्दै जित्दैन भनेकाले पनि यति धेरै भोट कसरी आयो भनेका जस्ता रिपोर्टहरू पनि आए।” उनले यसलाई सामान्य निर्वाचन मान्न नसकिने निष्कर्षमा पुगेका छन्।
प्रचण्डले राष्ट्रिय स्वतन्त्र पार्टीले प्राप्त गरेको झन्डै २ तिहाइको मतलाई स्वीकार गरेको बताए। उनले आफ्नो पार्टीले सरकारले गर्ने राम्रा कामको समर्थन र नराम्रा काममा आलोचना गर्ने रचनात्मक प्रतिपक्षीको भूमिका निर्वाह गर्ने बताए। उनले नेकपाले अब युवाहरूलाई विशेष प्राथमिकता दिने बताए।
प्रचण्डले सिङ्गो कम्युनिस्ट आन्दोलनको पुनर्गठन आवश्यक रहेको उल्लेख गर्दै भने, “हाम्रो पार्टी मात्र राम्रो बनाएर हुँदैन, नेपालको सिङ्गो कम्युनिस्ट आन्दोलनको पुनर्गठन आवश्यक छ।” उनले सरकारले गरेका पछिल्ला निर्णयहरूको विरोध गर्दै सुकुमवासीलाई बल प्रयोग गरेर हटाउने, ट्रेड युनियन खारेज गर्ने, र विद्यार्थी सङ्गठनमाथिको प्रहारलाई असंवैधानिक भनेका छन्।
