प्रधानमन्त्री कार्यालयले राजनीतिक नियुक्तिपछि पदमुक्त भएका व्यक्तिहरूको नाम संकलन गर्यो

१९ वैशाख, काठमाडौं । सार्वजनिक पदाधिकारीहरूको पदमुक्ति सम्बन्धी अध्यादेश राष्ट्रपतिद्वारा प्रमाणीकरण भएसँगै विभिन्न निकायमा राजनीतिक रूपमा नियुक्त भएका व्यक्तिहरूको नाम प्रधानमन्त्री कार्यालयमा पुगेको छ। सिंहदरबारका स्रोत अनुसार मन्त्रालयअनुसार नामहरू प्रधानमन्त्री कार्यालयमा पठाइएको छ। प्रधानमन्त्री कार्यालयले हाल ती नाम छुट्याउने कार्य गरिरहेको छ। ‘सबै मन्त्रालयबाट नियुक्ति पाएका व्यक्तिहरूका नाम प्रधानमन्त्री कार्यालयमा आएको छ,’ ती अधिकारीले जानकारी दिएका छन्।

अध्यादेश जारी भइसकेकाले ती व्यक्तिहरूलाई पत्र पठाएर पद छोड्न आग्रह गर्ने वा स्वतः नियुक्ति खारेज हुने भन्ने विषयमा छलफल भइरहेको छ। नियुक्ति पाएकाहरू मध्ये केही पदाधिकारीहरूले शनिबार राजीनामा दिने तयारी गरिरहेका थिए। सामूहिक बैठक पनि भएको थियो। तर राष्ट्रपति रामचन्द्र पौडेलले अध्यादेश जारी गरेपछि ती पदाधिकारीहरूले राजीनामा दिने बाटोबाट फर्किएका छन्। ‘राजीनामा दिने निर्णयका लागि हाम्रो सामूहिक बैठक भएको थियो। त्यतिबेला राष्ट्रपतिद्वारा अध्यादेश जारी भएको खबर आयो। त्यसपछि राजीनामा दिने उपयुक्त नलाग्यो,’ एक विश्वविद्यालयका पदाधिकारीले बताए, ‘प्रधानमन्त्री कार्यालयबाट पत्र आउने सूचना पाएका छौँ।’

राष्ट्रपति पौडेलले शनिबार स्वास्थ्य विज्ञान प्रतिष्ठानसम्बन्धी केही नेपाल ऐनहरू संशोधन गर्ने, सार्वजनिक पदाधिकारीको पदमुक्ति सम्बन्धी विशेष व्यवस्था कायम गर्ने र विश्वविद्यालयसम्बन्धी केही नेपाल ऐनहरू संशोधन गर्ने अध्यादेश २०८३ जारी गरेका छन्। विश्वविद्यालयका पदाधिकारीहरूले धमाधम राजीनामा दिइरहेका छन्। विभिन्न विश्वविद्यालयका पदाधिकारीहरूले भने अध्यादेश जारी हुनुअघि नै राजीनामा दिएका छन्। विश्वविद्यालय अनुदान आयोगका अध्यक्ष प्रा.डा. देवराज अधिकारीले पनि अध्यादेश जारी हुनुअघि नै राजीनामा दिएका छन्। उनले अध्यक्ष पदबाट शुक्रबारै राजीनामा दिएको जानकारी दिएका छन्। उनले भने, ‘अध्यादेश जारी हुनुअघि म हिजो नै राजीनामा दिएको छु।’ उनी २०७९ माघमा नियुक्त भएका थिए। त्यस्तै, त्रिभुवन विश्वविद्यालयका उपकुलपति प्रा.डा. दीपक अर्यालसहित अन्य पदाधिकारीहरूले पनि राजीनामा दिएका छन्। १७ वैशाखमा उपकुलपति अर्याल, शिक्षाध्यक्ष प्रा.डा. खड्ग केसी र रजिस्ट्रार प्रा.डा. केदारप्रसाद रिजालले राजीनामा दिएका थिए। सामग्री तयार पार्दा संस्कृत विश्वविद्यालयका उपकुलपति प्रा.डा. धनेश्वर नेपालले पनि शुक्रबार राजीनामा दिएका छन्। साथै, त्रिवि सेवा आयोगका अध्यक्ष प्रा.डा. धनश्याम भट्टराईले पनि राजीनामा दिएका छन्।