काभा महिला भलिबल च्याम्पियनसिपको खेल तालिका सार्वजनिक, ८ टोलीबीच प्रतिस्पर्धा हुँदै

सेन्ट्रल एसियन भलिबल एसोसिएसनले जेठ ८ देखि १५ गतेसम्म काभा महिला भलिबल च्याम्पियनसिपको खेल तालिका सार्वजनिक गरेको छ। प्रतियोगितामा नेपालसहित कीर्गिस्तान, भारत, माल्दिभ्स, इरान, कजाखस्तान, श्रीलंका र बंगलादेशका आठ टोली सहभागी हुनेछन्। नेपालले पहिलो खेल जेठ ८ गते भारतसँग खेल्नेछ भने फाइनल जेठ १५ गते दशरथ रंगशालामा हुनेछ।

२२ वैशाख, काठमाडौं – नेपालमा आयोजना हुने काभा महिला भलिबल च्याम्पियनसिपको खेल तालिका सेन्ट्रल एसियन भलिबल एसोसिएसन (काभा) ले मंगलबार सार्वजनिक गरेको छ। जेठ ८ देखि १५ गतेसम्म त्रिपुरेश्वरस्थित दशरथ रंगशालाको कभर्ड हलमा आयोजना हुने प्रतियोगितामा नेपालसहित सेन्ट्रल एसियाका ८ टोलीको सहभागिता रहनेछ।

घरेलु टोली नेपालसहित कीर्गिस्तान, भारत र माल्दिभ्स समूह ए मा छन् भने इरान, कजाखस्तान, श्रीलंका र बंगलादेश समूह बी मा छन्। नेपालले पहिलो खेल जेठ ८ गते भारतसँग खेल्नेछ। त्यही दिन कीर्गिस्तान र माल्दिभ्स तथा इरान र बंगलादेशबीच पनि खेल हुनेछ। दुवै समूहका शीर्ष दुई टोली सेमिफाइनलमा प्रवेश गर्नेछन्। फाइनल खेल जेठ १५ गते सम्पन्न हुनेछ।

प्रतियोगिताका लागि नेपाल भलिबल संघले यसअघि नै २० खेलाडीलाई बन्द प्रशिक्षणमा राखेर तयारी सुरु गरेको थियो। पीएम कप एनभीए लिगका कारण केही समय रोकिएको राष्ट्रिय टिमको प्रशिक्षण पुनः सुरु हुँदैछ। काभा महिला भलिबल च्याम्पियनसिपको प्रत्यक्ष प्रशारण हिमालय स्पोर्ट्समार्फत हुने छ।