१६ जेठ, काठमाडौं । हाल नेपालमा पश्चिमी न्यूनचापीय रेखा, स्थानीय हावा र पश्चिमदेखि पूर्वसम्म नेपाल नजिक रहेको न्यूनचापीय रेखाको प्रभाव रहेको छ । अहिले कोशी, मधेस, बागमती र गण्डकी प्रदेशमा पूर्ण रूपमा बादल लागेको छ भने लुम्बिनी, कर्णाली र सुदूरपश्चिम प्रदेशका हिमाली र पहाडी भू-भागमा सामान्यतया बादल लागेको छ । बाँकी तराई भू-भागमा आंशिक बादल लागेको छ । कोशी, लुम्बिनी, कर्णाली र सुदूरपश्चिम प्रदेशका कतिपय स्थानमा मध्यमसम्मको वर्षा भइरहेको छ । जल तथा मौसम विज्ञान विभाग, मौसम पूर्वानुमान महाशाखाले आज दिउँसो देशभर सामान्यतया बादल लाग्ने अनुमान गरेको छ । लुम्बिनी, कर्णाली र सुदूरपश्चिम प्रदेशका साथै कोशी, बागमती र गण्डकी प्रदेशका हिमाली र पहाडी भू-भागका केही स्थानमा तथा मधेस प्रदेश र कोशी, बागमती, गण्डकी, लुम्बिनी र सुदूरपश्चिम प्रदेशका तराई भू-भागका केही सानातिना स्थानहरूमा मेघगर्जन र चट्याङसहित मध्यमसम्मको वर्षा र हिमपातको सम्भावना छ । देशका तराई र पहाडी भू-भागका केही स्थानमा हावाहुरीको पनि सम्भावना देखिएको छ । आज राति सुदूरपश्चिम प्रदेश लगायत देशका हिमाली र पहाडी भू-भागमा सामान्यतया बादल रहनेछ भने बाँकी भू-भागमा आंशिक बादल हुनेछ । सुदूरपश्चिम, कर्णाली र गण्डकी प्रदेशका हिमाली र पहाडी भू-भागका केहि स्थानहरूमा र कोशी, बागमती र लुम्बिनी प्रदेशका हिमाली भू-भागका एक-दुई स्थानमा हल्का वर्षा र हिमपातको सम्भावना रहेको छ ।
