पूर्वपश्चिम महेन्द्र राजमार्गको झापा खण्डमा पर्ने रतुवा खोलामा बनिरहेको आकर्षक ‘स्टिल आर्क’ पुलको काम आधाभन्दा बढी सकिएको छ। काँकरभिट्टा–लौकही सडक योजना अन्तर्गत मोरङको बक्राहा र लोहन्द्र खोलामा पनि यस्तै किसिमका पुलहरू निर्माण भइरहेका छन्। चिनियाँ जेभी कम्पनीले ५ अर्ब रुपैयाँमा ठेक्का लिएका यी तीनवटै पुलको निर्माण कार्य सन् २०२७ फेब्रुअरीसम्ममा सकाउने लक्ष्य राखिएको छ। २४ जेठ, विराटनगर।
रतुवा खोलामा निर्माण भइरहेको उक्त पुलको करिब आधा काम सकिएको छ। काँकरभिट्टा–लौकही सडक योजना (पश्चिम खण्ड) ले कमल र दमक जोड्ने रतुवा खोलामा जस्तै आर्क ब्रिज मोरङमा पर्ने बक्राहा र लोहन्द्र खोलामा पनि निर्माण गरिरहेको आयोजनाका प्रमुख जगत प्रजापतिले जानकारी दिएका छन्। उनका अनुसार, यो पुल सामान्य पुलभन्दा फरक डिजाइन र अत्यन्त आकर्षक हुने छ।
रतुवा खोला खण्डका मात्र ५०–५५ प्रतिशत काम पूरा भएको उनले बताए। परियोजनाले समेटेका लोहन्द्र र बक्राहासहित तीनवटा पुल निर्माणको प्रगति करिब ४० प्रतिशत रहेको उनको भनाइ छ। रतुवा खोलामा ५८५ मिटर लामो पुल बनाउने योजना छ। यस पुलको पूर्वपश्चिम भागमा कङ्क्रिट संरचना हुनेछ भने बीचको भाग स्टीलका संरचनाले बनाइनेछ।
तीनै पुलको निर्माण कार्यको ठेक्का कोभेक–सिआरइजिसी–चाइना स्टेट सेभेन्थ जेभीले ५ अर्ब रुपैयाँमा लिएको छ। सन् २०२४ फेब्रुअरी १२ मा सम्झौता भएको पुल निर्माण अवधि सन् २०२७ फेब्रुअरी १ सम्म कायम छ। रतुवा पुलमा स्टिल आर्च निर्माणको काम तीव्रगतिमा भइरहेको छ। रतुवा नदीमा बन्ने ५८५ मिटर लामो पुलमध्ये २६४ मिटर खण्ड ‘स्टिल आर्क’ हुनेछ, बाँकी भाग कङ्क्रिटको हुनेछ।
सम्बन्धित खबर
