अन्तर्राष्ट्रिय चेन होटेल म्यारिअट इन्टरनेसनलका अध्यक्ष डेभिड म्यारिअटले काठमाडौंको ठमेलमा निर्माणाधीन ‘‘लक्जरी कलेक्सन बाई म्यारिअट’’ होटल निरीक्षण गरेका छन्। गैरआवासीय नेपाली संघका पूर्वअध्यक्ष शेष घले र जमुना गुरुङद्वारा निर्माणाधीन यस होटलमा करिब १५ अर्ब रुपैयाँ लगानी हुने बताइएको छ। दक्षिण एसियाकै पहिलो लक्जरी कलेक्सन दाबी गरिएको २२५ कोठाको यो होटल चालू वर्षको अन्त्यसम्ममा सञ्चालनमा ल्याउने तयारी छ। २४ जेठ, काठमाडौं।
अध्यक्ष म्यारिअटले आइतबार बिहान काठमाडौं आइपुगेपछि उच्च व्यवस्थापकसँगै होटेल निरीक्षण गर्न गएका थिए। होटेल निरीक्षण गर्दा उनले काठमाडौंमा यो स्तरको होटेल निर्माण भएको देख्दा निकै खुसी लागेको प्रतिक्रिया दिए। हालै फिनिसिङ भएका कोठाहरू हेर्दै उनले भने, ‘अहो, यो त युरोपियन स्ट्यान्डर्डमै रहेछ, निकै प्रभावशाली छ!’
ग्रुप अध्यक्ष म्यारिअटले यसका लगानीकर्ताहरूको भिजन र हिम्मतको प्रशंसा गरे। होटेलको गुणस्तर र लगानीलाई ध्यान दिँदै उनले होटेललाई लक्जरी ग्रेडमा स्तरोन्नति गर्दै ‘लक्जरी कलेक्सन बाई म्यारिअट’ ब्रान्ड प्रदान गरेका थिए। होटेलका सञ्चालक शेष घलेले भने, ‘काम तीव्र गतिमा भइरहेछ, आगामी तीनदेखि चार महिनाभित्र निर्माणको सबै काम पूरा हुनेछ।’
यो होटेल भारत, श्रीलंका, बंगलादेश र नेपालमा म्यारिअटको पहिलो लक्जरी कलेक्सन होटेल बन्ने भएकाले म्यारिअटका मापदण्डअनुसार निर्माण भइरहेको घलेले जानकारी दिए। होटेलकी अर्की सञ्चालिका जमुना गुरुङले म्यारिअट इन्टरनेसनलले व्यवस्थापन गर्ने लक्जरी कलेक्सन होटेलमध्ये नेपालको यो होटेल दक्षिण एसियाकै पहिलो लक्जरी होटेल भएको बताइन्।
‘हामी बढीभन्दा बढी पैसा खर्च गर्ने पर्यटकलाई लक्षित गरेर होटेल सञ्चालनमा ल्याउन लागेका हौं,’ उनले भनिन्, ‘लक्जरी कलेक्सन भएकाले अमेरिका, युरोप वा अन्य ठाउँमा रहेका यस्तै वा उत्कृष्ट सुविधा आफ्नो होटेलमा उपलब्ध गराउनेछौं।’
