१८ असार, काठमाडौं । सेयर कारोबारी दीपेन्द्र अग्रवालले सिन्धुपाल्चोकको भोटेकोशी हेली रिसोर्ट एण्ड स्पा सञ्चालन गर्ने र दायित्व भुक्तानी गर्ने भनी कम्पनी कब्जा गरेको भए पनि बैंकको ऋण र पुराना लगानीकर्ताको रकम तिरेका छैनन् । रिसोर्टका सम्पत्ति तथा दायित्वको जिम्मा लिएर उनले रिसोर्ट सञ्चालन गर्ने भन्दै पुराना लगानीकर्ताबाट सेयर किनेका थिए । तर, न त बैंकको ऋण तिरेका छन् न त सेयर बेच्ने लगानीकर्ताले प्राप्त गर्ने पैसा पाएका छन् । उल्टो बैंकले लिलामी सूचना जारी गरेपछि सेयर बिक्री गरिसकेका लगानीकर्ताहरूको नाम सार्वजनिक भएको छ र उनीहरू थप असहज अवस्थामा परेका छन् ।
रिसोर्टको नाममा नेपाल बैंकमा करीब ३२ करोड रुपैयाँ ऋण छ । अग्रवालले लामो समयदेखि यस ऋणको किस्ता तिरेका छैनन् । कर्जा जोखिममा परेपछि बैंकले धितो रहेको रिसोर्ट लिलामी बिक्रीका लागि सूचना निकालेको हो । बैंकले पहिले दुई पटक लिलामी प्रक्रिया गर्दा रिसोर्ट बिक्री भएन, अहिले गोप्य शिलबन्दी बोलकबोलको सूचना जारी गरिएको छ । उक्त प्रक्रिया असार २९ गतेसम्म खुला छ । तर अग्रवालले रिसोर्टमा ताला लगाएका छन्, जति कि कम्पनी कब्जा गरेपछि पनि। कोभिड र सिन्धुपाल्चोकको पहिरो जस्ता कारणले रिसोर्ट सञ्चालनमा समस्या आएपछि पुराना लगानीकर्तासँग सेयर बिक्री गरेर भएपनि बैंकको ऋण तिर्ने प्रक्रिया अघि बढाइएको थियो।
होटलका सञ्चालक सुवास प्रधानले नयाँ लगानीकर्ता भित्र्याउने जिम्मा लिए। प्रधानले नयाँ लगानीकर्ताको रुपमा दीपेन्द्र अग्रवाललाई परिचय दिएका थिए। प्रधान र अन्य लगानीकर्ताबीच नयाँ लगानीकर्तालाई बहुमत सेयर दिने र सम्पत्ति–दायित्व पनि उसैले स्वीकार्ने सहमति भएको थियो। पहिलो चरणमा चिनबहादुर रानाभाटको नाममा रहेको १७ लाख कित्ता सेयर अग्रवाललाई हस्तान्तरण भयो। अग्रवालले नेपाल बैंकको ६ करोड ९० लाख रुपैयाँ बक्यौता तिरेका थिए। तर, बिक्री गर्ने लगानीकर्ता रानाभाटले सोसँग सम्बन्धित ७ करोड रुपैयाँ बाँकी रकम पाएका छैनन्।
