३ भदौ, काठमाडौं । परम्परागत नेपाली ऊनको फेसल्टिङलाई समकालीन कलाको रूपमा प्रस्तुत गर्दै ८ कलाकारहरूले ‘सुसम्झना: फेसल्टिङ मेरोजिज अफ कल्चर’ नामक कला प्रदर्शनी गर्ने भएका छन्। सफल श्रेष्ठले क्युरेट गर्ने यो प्रदर्शनी स्वयम्भुमा अवस्थित सर्वश्रेष्ठ ग्यालरीमा आयोजना गरिनेछ। यो प्रदर्शनी फेल्ट फ्युचर्स: अ डिजाइन फेलोसिपको समापनको रूपमा आयोजना गरिएको हो। यसमा महिला नेतृत्वको सामाजिक उद्यम फेल्ट दि वे, काठमाडौं विश्वविद्यालयको कला विभाग र सर्वश्रेष्ठ ग्यालरीको सहकार्य रहनेछ।
प्रदर्शनीमा निलम राई, पर्सिस राई, प्रभा नापित, राजश्री श्रेष्ठ, सपना सञ्जीवनी, सफल श्रेष्ठ, सोना ल्हामु तामाङ र सुमनिता बज्रचार्यका कलाकृतिहरू राखिनेछन्। प्रदर्शनीमा आएका दर्शकहरूले काँचो ऊनबाट बनाइएका विभिन्न सामग्रीहरूको अवलोकन गर्न पाउनेछन्। यस प्रदर्शनीमा राखिएका सबै कलाकृतिहरू नेपाली ऊनबाट मात्र बनेका छन् जुन सुन्दर प्रकृतिक र जैविक रूपमा नष्ट हुने विशेषता बोकेका छन्।
