सडकका खाल्डा पूर्याउन ५ वर्षभित्र ६९ अर्ब बजेट विनियोजन, आधा मात्र खर्च, समस्या यथावत्
महालेखा परीक्षकको प्रतिवेदन अनुसार पछिल्ला ५ वर्षमा सडक मर्मतका लागि विनियोजित ६८ अर्ब ७४ करोडमध्ये ३७ अर्ब ९० करोड मात्रै खर्च भएको छ। रणनीतिक सडक मर्मतमा विनियोजित ५६ अर्ब ३६ करोडमध्ये ३० अर्ब १४ करोड खर्च भएको र आवधिक मर्मत तथा पुनर्निर्माणमा प्रगति न्यून रहेको प्रतिवेदनले देखाएको छ। महालेखाले सडक मर्मत, बजेट, भारक्षमता, पुल संरक्षण र सडक सुरक्षामा कानुनी कार्यान्वयन, समन्वय र जनशक्ति सुधार गर्न सरकारलाई सुझाव दिएको छ। ४ भदौ, काठमाडौं।
नेपालमा सडक मर्मतका लागि हरेक वर्ष ठूलो बजेट छुट्याइने भए तापनि लक्ष्यअनुसार काम नहुँदा गुणस्तरमा ठूलो सुधार भएन। महालेखा परीक्षकको कार्यालयले गरेको लेखा परीक्षण प्रतिवेदनअनुसार पछिल्ला ५ वर्षमा सडक बोर्डले रणनीतिक र स्थानीय सडक मर्मतका लागि कुल ६८ अर्ब ७४ करोड रुपैयाँ छुट्याएको छ। त्यसमध्ये ५५ अर्ब ९६ करोड निकासा भयो भने खर्च ३७ अर्ब ९० करोडको हाराहारी मात्र भएको देखिन्छ। महालेखा परीक्षकको कार्यालयका अनुसार सडक सञ्जाल विस्तारका कारण बजेट घाटो भइरहेको छ भने विनियोजित बजेट खर्च नहुनु ठूलो समस्या हो।
सम्बन्धित निकायबीच समन्वय अभाव, न्यून बजेट, योजना स्वीकृति, ठेक्का प्रक्रिया र भुक्तानीमा ढिलाइका कारण बजेट लक्षित अनुसार खर्च हुन नसकेको निष्कर्ष प्रतिवेदनमा उल्लेख छ। सडक सञ्जालको नियमतया मर्मत नहुँदा सडक जीर्ण हुँदै जाने र पुनर्निर्माणको भार बढेको छ, जसले दुर्घटना जोखिम बढाउने महालेखाले जनाएको छ। महालेखाले सडक मर्मतका लागि बजेट छुट्याउन र सम्बन्धित निकायबीच आवश्यक समन्वय गरी योजना संचालन प्रभावकारी बनाउन सरकारलाई निर्देशन दिएको छ।
